Այս ամենի հետևում իրական մարդկանց պատմություններ են․ ԱԳՆ խոսնակն անդրադարձել է Երևանում բուժվող արցախցու մասին Euronews-ի ռեպորտաժին

ԵՐԵՎԱՆ, 5 ՕԳՈՍՏՈՍԻ, ԱՐՄԵՆՊՐԵՍ։ Ադրբեջանի կողմից Լաչինի միջանցքի արգելափակման հետևանքով Արցախում առաջացած հումանիտար աղետի ֆոնին Euronews հեռուստաընկերությունը ռեպորտաժ է հրապարակել, որում ներկայացվում է Երևանում քաղցկեղի դեմ բուժվող Ստեփանակերտի բնակչի պատմությունը։

Ստեփանակերտի բնակիչ Վաչիկ Բաբաջանյանը բուժվելու նպատակով Ստեփանակերտից Երևան է տեղափոխվել Կարմիր խաչի միջազգային կոմիտեի ուղեկցությամբ։ Նա պատմում է, որ այն ժամանակ, երբ ինքը Հայաստան է տեղափոխվել, Լաչինի միջանցքում ադրբեջանցիների կողմից վերահսկողությունն այդքան խիստ չի եղել, որքան հիմա է։

Illegal closing of #LachinCorridor &inhuman blockade of #NagornoKarabakh by Azerbaijan is causing irreversible harm to NK people.

And behind it there are 120K real human stories like this, each of them suffering from pain to be deprived of homeland, family, from what they love. https://t.co/B54qbJ7xkr

— Ani Badalyan, Spokesperson of MFA of Armenia (@ArmSpoxMFA) August 5, 2023

«Այսօրվա նման չէր, որադրբեջանցիներըկարող են հիվանդին իջեցնել, ինչ-որ ադրբեջանցի բժիշկների կողմից զննել։ Ես հիմա չեմ կարող այդ անցակետով անցնել՝ սիրտս այս վիճակում։ Կամ պետք է հայհոյեմ կամ հարվածեմ․․․»,- նշում է Բաբաջանյանը։

Վաչիկ Բաբաջանյանը պատմում է՝ անընդհատ կապի մեջ է ընտանիքի անդամների հետ, միշտ խնդրում է, որ ցույց տան իր հողամասը՝ նշելով, որ իր բացակայության պայմաններում իր կինն առաջին անգամ լոլիկ է աճեցրել։ Նրա խոսքով՝ կնոջ համար դա հեշտ չի եղել, քանի որ այդ գործը միշտ ինքն է արել, սակայն հիմա՝ իր բացակայության պայմաններում, իր ուսուցչուհի կինը ստիպված է եղել այդ գործը իր վրա վերցնել։

Նա նաև նշում է, որ իր հիվանդության մասին ընդհանրապես չի մտածում, մահից չի վախենում, քանի որ նախորդ պատերազմների ժամանակ «մի քանի անգամ մահացել, հետ է եկել»․ միակ բանը, որ իրեն տանջում է կարոտն է։

Euronews-ի ռեպորտաժին անդրադարձել է ՀՀ ԱԳՆ մամուլի քարտուղար Անի Բադալյանը։ Նա X-ում (նախկինում Twitter) վերահրապարակել է ռեպորտաժը՝ ընդգծելով, որ Լեռնային Ղարաբաղի անմարդկային շրջափակումն անդառնալի վնաս է հասցնում բնակչությանը:

«Ադրբեջանի կողմից Լաչինի միջանցքի և Լեռնային Ղարաբաղի ապօրինի և անմարդկային շրջափակումը անդառնալի վնաս է հասցնում Լեռնային Ղարաբաղի բնակչությանը։ Այս ամենի հետևում 120 հազար մարդու իրական պատմություններ են, ինչպիսին այս մեկն է։ Այս մարդկանցից յուրաքանչյուրը տառապում է հայրենիքից, ընտանիքից ու իր սիրած սիրած ամեն ինչից զրկվելու ցավից», - գրել է Բադալյանը։

Ադրբեջանն ապօրինի արգելափակել է Լեռնային Ղարաբաղը Հայաստանի հետ կապող միակ ճանապարհը՝ Լաչինի միջանցքը, ինչի հետևանքով Լեռնային Ղարաբաղի բնակչությունն ամբողջությամբ զրկված է պարենի, դեղորայքի, վառելիքի, առաջին անհրաժեշտության այլ ապրանքների մատակարարումներից։ Ադրբեջանն արգելափակել է նաև Լեռնային Ղարաբաղի գազամատակարարումն ու էլեկտրամատակարարումը։ Հայաստանը Լեռնային Ղարաբաղ հումանիտար օգնություն է ուղարկել, սակայն հումանիտար բեռով բեռնված բեռնատարներն արդեն 11 օր կանգնած են Լաչինի միջանցքի սկզբնամասում, քանի որ Ադրբեջանն արգելում է դրանց մուտքը Լեռնային Ղարաբաղ։