2 րոպեի ընթերցում
ԵՐԵՎԱՆ, 12 ՀՈՒԼԻՍԻ, ԱՐՄԵՆՊՐԵՍ։ Հյուսիսային Կորեան մեծ հեռահարության բալիստիկ հրթիռ է արձակել Ճապոնական ծով։ «Արմենպրես»-ի փոխանցմամբ՝ այս մասին հաղորդում է Yonhap գործակալությունը՝ վկայակոչելով Հարավային Կորեայի զինված ուժերի շտաբների պետերի միացյալ կոմիտեին։
Հրթիռի արձակումը տեղի է ունեցել Փհենյանի մերձակայքից՝ տեղի ժամանակով առավոտյան ժամը 10-ին։ Հրթիռը թռել է շուրջ 1000 կմ, որից հետո ընկել է ծովը։
Ըստ գործակալության՝ Փհենյանն ավելի վաղ նախազգուշացրել էր, որ ռազմական գործողություն կիրականացնի՝ ԱՄՆ հետախուզական ինքնաթիռների գործողությունների պատճառով։ Կիմ Յո Չենը՝ հյուսիսկորեական առաջնորդ Կիմ Չեն Ընի քույրը, հուլիսի 10-ին և 11-ին հայտարարել էր, որ ամերիկյան ռազմական լրտեսական ինքնաթիռը «ներխուժել է» Հյուսիսային Կորեայի բացառիկ տնտեսական գոտի։
Հրթիռի արձակումից հետո Հարավային Կորեայի նախագահ Յուն Սոկ Յոլը, որը գտնվում է Լիտվայում ՆԱՏՕ-ի գագաթնաժողովին, Ազգային անվտանգության խորհրդի արտակարգ նիստ է անցկացրել։
Բացի այդ, Հարավային Կորեայի և ԱՄՆ-ի զինվորականները արձակումից անմիջապես հետո հանդիպում են անցկացրել և հաստատել, որ է՛լ ավելի կամրապնդեն իրենց միացյալ պաշտպանությունը Հյուսիսային Կորեայի կողմից ցանկացած սպառնալիքի դեմ։
Վերջին անգամ Հյուսիսային Կորեան մեծ հեռահարության հրթիռ էր արձակել 3 ամիս առաջ՝ ապրիլի 13-ին։