Մասկը մարզումներ է անցկացրել ջիու ջիցուի սև գոտի ունեցող Լեքս Ֆրիդմանի հետ՝ պատրաստվելով Ցուկերբերգի հետ մենամարտին

ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: Ամերիկացի միլիարդատեր Իլոն Մասկը մարտարվեստի պարապմունք է անցկացրել ռուս-ամերիկացի հայտնի բլոգեր և գիտնական, ջիու ջիցուի սև գոտի ունեցող Լեքս Ֆրիդմանի հետ՝ պատրաստվելով խառը մենամարտերի կանոններով (MMA) մենամարտին META ընկերության ղեկավար Մարկ Ցուկերբերգի հետ: «Արմենպրես»-ի փոխանցմամբ՝ այս մասին Ֆրիդմանը հունիսի 28-ին հայտնել է Twitter-ի իր էջում:

«Երեկ ես Իլոն Մասկի հետ հանպատրաստից մարզվել եմ մի քանի ժամ: Ես չափազանց տպավորված եմ նրա ուժով, հզորությամբ և հմտություններով ինչպես ոտքի վրա, այնպես էլ գետնին: Դա էպիկական էր»,- գրել է Ֆրիդմանը:

I did an impromptu training session with @elonmusk for a few hours yesterday. I'm extremely impressed with his strength, power, and skill, on the feet and on the ground. It was epic. It's really inspiring to see Elon and Mark doing martial arts, but I think the world is served… pic.twitter.com/cq00A9Xnmw

— Lex Fridman (@lexfridman) June 27, 2023

Նա նաև հավելել է, որ «շատ ոգեշնչող է տեսնել, թե ինչպես են Իլոնն ու Մարկը մարտարվեստով զբաղվում, բայց ավելի լավ կլիներ ամբողջ աշխարհի համար, եթե նրանք պարզապես մարզվեին և չմենամարտեին ռինգում»։

Իր հերթին, Մարկ Ցուկերբերգը մայիսին մասնակցել է ջիու ջիցուի իր առաջին մրցաշարին՝ արժանանալով ոսկե և արծաթե մեդալների:

Հունիսի 22-ին Ցուկերբերգն ընդունել էր Մասկի հրավերը՝ հարաբերությունները պարզելու առանց կանոնների մենամարտում: Մասկը մենարմարտի էր կանչել Meta ընկերության ղեկավարին այն բանից հետո, երբ համացանցում տեղեկություն էր հայտնվել, թե Meta-ն մտադիր է ստեղծել Մասկին պատկանող Twitter-ի մրցակից հարթակ:

Ինչպես ավելի վաղ հայտնել էր «Արմենպրես»-ը, Ultimate Fighting Championship-ի (UFC) նախագահ Դեյնա Ուայթի կարծիքով՝ Մասկ-Ցուկերբերգ մենամարտը կլինի պատմության մեջ ամենադիտվածը և հարյուրավոր միլիոն դոլար կհավաքի բարեգործական նպատակներով: Ուայթը մտադիր է կազմակերպել երկու միլիարդատերերի մարտը: