ԱՄՆ-ի և Թուրքիայի նախագահների խորհրդականները քննարկել են ՌԴ-ում վերջին իրադարձությունները և ՆԱՏՕ-ին Շվեդիայի անդամակցությունը
1 րոպեի ընթերցում
![ԱՄՆ-ի և Թուրքիայի նախագահների խորհրդականները քննարկել են ՌԴ-ում վերջին իրադարձությունները և ՆԱՏՕ-ին Շվեդիայի անդամակցությունը](http://armenpress.am/resized/480/static/news/b/2023/06/1114298.jpg)
ԵՐԵՎԱՆ, 28 ՀՈւՆԻՍԻ, ԱՐՄԵՆՊՐԵՍ: ԱՄՆ նախագահի ազգային անվտանգության հարցերով խորհրդական Ջեյք Սալիվանը Թուրքիայի նախագահի գլխավոր խորհրդական Աքիֆ Չաղաթայ Քըլըչի հետ հեռախոսազրույցում քննարկել է Ռուսաստանը, հացահատիկի գործարքի երկարաձգումը և ՆԱՏՕ-ին Շվեդիայի անդամակցությունը։ Այդ մասին հաղորդում է «Արմենպրես»-ը՝ վկայակոչելով Սպիտակ տան տարածած մամուլի հաղորդագրությունը:
«Նրանք քննարկել են Ռուսաստանում վերջին իրադարձությունները և Ուկրաինային մեր մշտական աջակցությունը, մինչ այն պաշտպանվում է ռուսական ագրեսիայի դեմ, ինչպես նաև Թուրքիայի ջանքերը՝ ապահովելու Հացահատիկի սևծովյան նախաձեռնության վերսկսումը», - ասվում է հաղորդագրության մեջ։
Նշվում է, որ Սալիվանն ու Քըլըչը համաձայնության են եկել Էգեյան ծովում կայունության պահպանման կարևորության հարցում։ Միացյալ Նահանգների նախագահի օգնականը ողջունել է Թուրքիայի և Հունաստանի միջև կառուցողական փոխգործակցությունը։
Բացի այդ, նրանք քննարկել են Վիլնյուսում ՆԱՏՕ-ի առաջիկա գագաթնաժողովի նախապատրաստական աշխատանքները։
«Սալիվանն ընդգծել է Միացյալ Նահանգների այն տեսակետը, որ Շվեդիան պետք է հնարավորինս շուտ դառնա ՆԱՏՕ-ի անդամ», - հայտարարել են Սպիտակ տանը։