Պուտինը հանդես կգա ուղերձով. Մոսկվայում սահմանվել է հակաահաբեկչական գործողության ռեժիմ
1 րոպեի ընթերցում
![Պուտինը հանդես կգա ուղերձով. Մոսկվայում սահմանվել է հակաահաբեկչական գործողության ռեժիմ](http://armenpress.am/resized/480/static/news/b/2023/06/1114013.jpg)
ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ։ Ռուսաստանում «Վագներ» մասնավոր ռազմական ընկերության գործողությունների հետ կապված` ՌԴ նախագահ Վլադիմիր Պուտինը մոտ ժամանակներս հանդես կգա ուղերձով։ Ինչպես տեղեկացնում է «Արմենպրես»-ը, վկայակոչելով ՏԱՍՍ-ին, այս մասին հայտնել է ՌԴ նախագահի մամուլի քարտուղար Դմիտրի Պեսկովը։
Հնարավոր ահաբեկչական գործողությունները կանխելու նպատակով Մոսկվայում ու Մոսկովյան շրջանում հայտարարվել է հակաահաբեկչական գործողության ռեժիմ։
Ավելի վաղ Պրիգոժինը հայտարարել էր, որ «Վագների» թիկունքը ենթարկվել է ռմբակոծման ՌԴ զինված ուժերի կողմից։ Ռուսաստանի պաշտպանության նախարարությունը հերքել է տեղեկատվությունը։ Պրիգոժինը հայտարարել է, որ իրենք «25 000 զորքով շարժվում են երկրում արդարությունը վերականգնելու»։ ՌԴ Անվտանգության դաշնային ծառայությունը Պրիգոժինի խոսքերն ու գործողությունները անվանել է երկրում զինված քաղաքացիական պատերազմ սկսելու կոչ։
Ռուսական ընդդիմադիր լրատվամիջոցները հայտնում են, որ Դոնի Ռոստով քաղաքն արդեն «Վագների» վերահսկողության տակ է։