Ադրբեջանում ոստիկանությունը ծեծի է ենթարկել ջրամբարի կառուցման դեմ բողոքող ակցիայի մասնակիցներին
3 րոպեի ընթերցում
ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Ադրբեջանի Գետաբեկի շրջանի Սոյդուլու գյուղի բնակիչները բողոքում են հանքարդյունաբերական ձեռնարկությունում ջրամբարի կառուցման դեմ՝ նշելով, որ դա կվնասի թե՛ մարդու առողջությանը, թե՛ շրջակա միջավայրին։
Այս մասին, ինչպես հաղորդում է «Արմենպրես»-ը, հայտնում են ադրբեջանական ԶԼՄ-ները:
Police forces of illegitimate autocratic regime in Azerbaijan have brutally attacked Azerbaijani villagers who are trying to save their village against Aliyev's company. pic.twitter.com/oSgghqlVnK
— Rüstəm İsmayılbəyli (@ismayilbaylir) June 20, 2023
Տեղեկությունների համաձայն՝ հունիսի 20-ին ցուցարարների և ոստիկանության միջև միջադեպ է գրանցվել, որի ժամանակ ոստիկանը ցուցարար կնոջ ուղղությամբ արցունքաբեր գազ է կիրառել:
Ադրբեջանցի օգտատերերի պնդմամբ՝ ոստիկանությունը նաև մահակների կիրառմամբ ծեծի է ենթարկել ակցիայի մասնակիցներին, որի հետևանքով գրանցվել է 10-ից ավելի տուժած:
Հունիսի 21-ին ակցիայի վայր է ժամանել Գետաբեկի շրջանի ղեկավարը, ով վստահեցրել է, որ ակցիայի մասնակից կնոջ ուղղությամբ արցունքաբեր գազի կիրառման փաստի առթիվ կատարվում է համապատասխան քննություն, և ոստիկանի գործողություններին կտրվի իրավական գնահատական։
Gadabay residents continue their action. They demand the release of those detained by the police. pic.twitter.com/66NhLOIZYH
— Səməd Şıxı (@Samed_shixi) June 21, 2023
«Այս լիճն արդեն գոյություն ունի 11 տարի։ Մինչ օրս դժգոհություն չեք հայտնել, անցած տարիներին դա ոչ մեկի համար վտանգ չի ներկայացրել։ Սպասենք այս լճի հետ կապված փորձագետների կարծիքին։ Եթե ձեր մտահոգությունը կապված է առողջությանը սպառնացող վտանգի հետ, ապա մենք այս հարցը կպահենք լուրջ վերահսկողության տակ։ Միանշանակ, չի կարող լինել այնպես, որ լիճը վնասի մարդկանց առողջությանը: Ես էլ եմ լճի մոտ ապրում։ Ի՞նչ եք կարծում՝ իմանալով, որ այնտեղ վտանգ կա, ես այնտեղ կապրեի՞» - ասել է Գետաբեկի շրջանի ղեկավար Օրխան Մուրսալովը:
Նշվում է, որ ի հակադրություն շրջանի ղեկավարի պնդումներին՝ գյուղացիները նշել են, որ վերջին տարիներին գյուղում քաղցկեղով հիվանդների թվի աճ է նկատվել: