387.83
Ռուսաստանը հայտնել է Մոսկվային մոտեցող ԱԹՍ-ների խոցման մասին, կատարվել են բնակիչների տարհանումներ
2 րոպեի ընթերցում
ԵՐԵՎԱՆ, 30 ՄԱՅԻՍԻ, ԱՐՄԵՆՊՐԵՍ: Ռուսաստանում խոցել են մի քանի անօդաչու թռչող սարքեր, որոնք թռչում էին դեպի Մոսկվա: «Արմենպրես»-ի փոխանցմամբ՝ այս մասին հաղորդել է Մոսկվայի մարզի նահանգապետ Անդրեյ Վորոբյովը:
«Այսօր առավոտյան Մոսկվայի մարզի որոշ շրջանների բնակիչները կարող էին լսել պայթյունների ձայներ. դա մեր հակաօդային պաշտպանությունն է։ Խոցվել են Մոսկվային մոտեցող մի քանի անօդաչու թռչող սարքեր», - գրել է Վորոբյովը։
Նա տարածաշրջանի բնակիչներին խնդրել է հանգստություն պահպանել և հավելել է, որ դեպքի վայրում աշխատում են բոլոր արտակարգ ծառայությունները:
Իր հերթին Մոսկվայի քաղաքապետ Սերգեյ Սոբյանինը հայտնել է, որ առավոտյան անօդաչու թռչող սարքերի հարձակման հետևանքով Մոսկվայում մի քանի շենք է վնասվել։
Ինչպես հաղորդում է ТАСС-ը, միջադեպի հետևանքով տուժածներ չկան: Նովայա Մոսկվայում բազմաբնակարան շենքերից մեկի երեք հարկերում պատուհանները կոտրվել են: Ականատեսները հայտնել են, որ միջադեպի պահին ուժգին պայթյուն է լսվել: Այնուհետև հայտնի է դարձել, որ ուժային կառույցների աշխատակիցները ստուգում են Մոսկվայի արևմուտքում և հարավ-արևմուտքում գտնվող ևս երկու բազմահարկ բնակելի շենքերում տեղի ունեցած պայթյունների մասին տեղեկատվությունը:
Արտակարգ ծառայությունների աշխատանքի ժամանակ բնակարաններից տարհանել են երկու շենքի բնակիչների այն մուտքերից, ուր ընկել են ԱԹՍ-ները: Այնուհետև բնակիչներին թույլատրվել է վերադառնալ իրենց բնակարաններ:
Մոսկվայի մի քանի փողոցներում երթևեկությունը դադարեցվել է:
ՌԴ մայրաքաղաքի երեք օդանավակայաններն աշխատում են նորմալ ռեժիմով:
Բաժանորդագրվեք մեր ալիքին Telegram-ում