«Վագներ»-ի ղեկավարը կշարունակի կռվել Բախմուտում՝ չնայած մինչ այդ հնչեցրած սպառնալիքներին
2 րոպեի ընթերցում
![«Վագներ»-ի ղեկավարը կշարունակի կռվել Բախմուտում՝ չնայած մինչ այդ հնչեցրած սպառնալիքներին](http://armenpress.am/resized/480/static/news/b/2023/05/1110424.jpg)
ԵՐԵՎԱՆ, 8 ՄԱՅԻՍԻ, ԱՐՄԵՆՊՐԵՍ: «Վագներ» մասնավոր ռազմական ընկերության ղեկավար Եվգենի Պրիգոժինը հայտարարել է, որ Ռուսաստանի պաշտպանության նախարարությունն իրենց խոստացել է տրամադրել զենք և զինամթերք այնքան, որքան հարկավոր է՝ հետագա գործողությունները շարունակելու համար: «Արմենպրես»-ի փոխանցմամբ՝ այս մասին Պրիգոժինը ձայնագրության միջոցով հայտնել է իր Telegram ալիքում:
Պրիգոժինի խոսքով՝ մարտական կարգադրություն է եղել, որի մեջ նշվում է, որ «Վագներ»-ը Բախմուտում կարող է գործել այնպես, ինչպես հարկ է համարում: Իսկ Ռուսաստանի ՊՆ-ի և մասնավոր ռազմական ընկերության միջև փոխգործակցության հարցերով պետք է զբաղվի բանակի գեներալ Սերգեյ Սուրովիկինը:
Ինչպես ավելի վաղ հայտնել էր «Արմենպրես»-ը, մայիսի 5-ին Պրիգոժինը դիմել էր ՌԴ գլխավոր շտաբի հրամանատար Վալերի Գերասիմովին և ՌԴ պաշտպանության նախարար Սերգեյ Շոյգուին՝ սպառնալով մայիսի 10-ին իր զինվորականներին դուրս բերել Բախմուտից:
Իսկ մայիսի 6-ին Պրիգոժինը հայտարարել էր, որ Բախմուտում «Վագներ»-ի դիրքերը կփոխանցվեն «Ախմատ» հատուկ նշանակության ստորաբաժանումներին:
Բախմուտը շարունակում է մնալ Ուկրաինայի առաջնագծի ամենաթեժ կետերից մեկը, որտեղ երկու կողմերն էլ մեծ կորուստներ են կրում: Քաղաքի համար մարտեր են ընթանում արդեն 9 ամիս՝ անցյալ տարվա օգոստոսից: