2 րոպեի ընթերցում
ԵՐԵՎԱՆ, 3 ԱՊՐԻԼԻ, ԱՐՄԵՆՊՐԵՍ: Ֆրանսիայի նախագահ Էմանուել Մակրոնն ապրիլի 5-7-ը պետական այցով կլինի Չինաստանում: Այս տեղեկությունը հաստատել է Չինաստանի արտաքին գործերի նախարարության պաշտոնական ներկայացուցիչ Հուա Չունյինգը։ Այդ մասին «Արմենպրես»-ը տեղեկանում Է ТАСС գործակալությունից:
«Չինաստանի Ժողովրդական Հանրապետության նախագահ Սի Ծինփինի հրավերով Ֆրանսիայի նախագահ Էմանուել Մակրոնը ապրիլի 5-7-ը պետական այցով կժամանի Չինաստան», - ասված է գերատեսչության կայքում հրապարակված հայտարարության մեջ։
Ինչպես մարտի 31-ին հաղորդել էր Agence France-Presse-ը՝ վկայակոչելով Ելիսեյան պալատին, Չինաստան այցի ընթացքում Մակրոնը ծրագրում է այդ երկրի ղեկավարության հետ քննարկել Ուկրաինայում տիրող իրադրությունը և Պեկինին զգուշացում անել՝ կապված Ռուսաստանին ռազմական աջակցություն ցույց տալու հետ:
Գործակալությունը նաև հայտնել էր, որ Մակրոնը կձգտի սկիզբ դնել հարաբերությունների վերականգնման գործընթացին՝ կորոնավիրուսի համավարակի պատճառով անձնական շփումների բացակայության երկարատև շրջանից հետո։ Մակրոնը և Սի Ծինփինը վերջին անգամ հանդիպել են Ինդոնեզիայում Մեծ քսանյակի գագաթնաժողովի շրջանակներում, իսկ Ֆրանսիայի նախագահի վերջին այցը Պեկին կայացել է 2018 թվականի հունվարին: