Պատերազմի արհավիրքը դեռ չհաղթահարած ու երկրաշարժից տուժած Հալեպն «Արմենպրես»-ի նկարահանող խմբի աչքերով
3 րոպեի ընթերցում
![Պատերազմի արհավիրքը դեռ չհաղթահարած ու երկրաշարժից տուժած Հալեպն «Արմենպրես»-ի նկարահանող խմբի աչքերով](http://armenpress.am/resized/480/static/news/b/2023/02/1104968.jpg)
ԵՐԵՎԱՆ, 24 ՓԵՏՐՎԱՐԻ, ԱՐՄԵՆՊՐԵՍ։ Սիրիան, որտեղ 2011 թվականից սկսված դաժան հակամարտության վերջը, կարծես, չի էլ երևում, 2023 թվականին բախվեց ևս մեկ փորձության. փետրվարի 6-ին տեղի ունեցած ավերիչ երկրաշարժը ևս մեկ ծանր հարված հասցրեց երկրին՝ հանգեցնելով փլուզումների և մարդային կորուստների տարբեր բնակավայրերում:
Սիրիայի նկատմամբ կիրառվող պատժամիջոցների պատճառով հազվադեպ երկրներ էին, որ շտապեցին մարդասիրական օգնություն և փրկարարական ջոկատներ ուղարկել երկիր, մինչդեռ նույն երկրաշարժից տուժած Թուրքիային օգնության ձեռք մեկնեցին բազմաթիվ երկրներ:
Որոնողափրկարարական աշխատանքներ իրականացնելու նպատակով Սիրիա էին ժամանել աշխարհի ընդամենը 5 երկրի 8 թիմեր, այդ թվում՝ Հայաստանը, որը արդեն իսկ կազմակերպել է մարդասիրական օգնության երրորդ խմբաքանակի տեղափոխումը։ Մարդասիրական օգնությունից բացի, երկրաշարժի արհավիրքից տուժած Սիրիային Հայաստանի աջակցությունը հայտնելու համար Սիրիա էր ժամանել անձամբ արտգործնախարար Արարատ Միրզոյանը, հանդիպել տեղի իշխանությունների հետ, ծանոթացել իրավիճակին:
Պաշտոնական հանդիպումներից հետո Արարատ Միրզոյանն այցելեց Հալեպ քաղաք, որը երկրաշարժից ամենաշատը տուժած բնակավայրերից մեկն է:
Հայաստանի արտաքին գործերի նախարարին Սիրիա այցի ընթացքում ուղեկցում էր նաև «Արմենպրես»-ի նկարահանող խումբը, որը Հալեպում ականատես եղավ այն արհավիրքին, որը պատուհասել էր քաղաքը փետրվարի 6-ին. փողոցում վրանների մեջ քնող մարդիկ, փլուզված շենքեր, վնասված ճանապարհներ ու ենթակառուցվածքներ: Հալեպցիները դեռևս չեն հաղթահարել պատերազմի հետևանքները, իսկ երկրաշարժն էլ ավելի է խորացրել ճգնաժամը։
Մարդասիրական կազմակերպությունները օգնություն են ցուցաբերում երկրաշարժից տուժածներին, և ներկայումս վերականգնման աշխատանքներ են իրականացնում, որը, դեռևս ցավոք, չի բավականացնում հետևանքները չեզոքացնելու համար։
Տեղի իշխանությունները նշում են, որ քաղաքն ամբողջությամբ վերականգնելը դժվար և երկարատև աշխատանք կլինի։ Նրանց խոսքով՝ միջազգային հանրությունը կարող է վճռորոշ դեր խաղալ այս ավերիչ իրադարձություններից հետո Հալեպի ժողովրդին օգնելու գործում։
Չնայած բոլոր դժվարություններին՝ Հալեպի բնակիչները տոկունություն են ցուցաբերում և քրտնաջան աշխատում ՝ հաղթահարելու ինչպես պատերազմի, այնպես էլ երկրաշարժի հետևանքով առաջացած ավերածությունները։
Նյութը պատրաստեց Կարեն Խաչատրյանը
Լուսանկարները՝ Հայկ Մանուկյանի