Կիրիակոս Միցոտակիսն նշել է, որ Հունաստանը կարող է դառնալ Ուկրաինային գազ մատակարարող երկիր
1 րոպեի ընթերցում
ԵՐԵՎԱՆ, 14 ՀՈՒՆՎԱՐԻ, ԱՐՄԵՆՊՐԵՍ: Հունաստանի վարչապետ Կիրիակոս Միցոտակիսը ասել է, որ Հունաստանը կարող է Ռուսաստանի փոխարեն բնական գազ մատակարարել Ուկրաինային։
Ինչպես «Արմենպրես»-ը տեղեկանում է «ՌԻԱ Նովոստի»-ից, այս մասին Ալեքսանդրապոլիսում կայացած մամուլի ասուլիսի ժամանակ հայտնել է Հունաստանի վարչապետն, ընդգծելով, որ այս նավահանգստային քաղաքը կարող է դառնալ էներգետիկ խոշոր հանգույց։
«Հունաստանը դառնում է բնական գազի մատակարարման դարպաս, որը ծածկում է ոչ միայն մեր, այլ նաև՝ Բալկանների և, ինչու ոչ, Արևելյան Եվրոպայի կարիքները: Եվ ինչո՞ւ ոչ՝ Ուկրաինայի» - ասել է Միցոտակիսը, ում կարծիքով ինչ-որ պահի ռազմական հակամարտությունը կավարտվի, և Ուկրաինան բնական գազի մատակարարման կարիք կունենա։
«Դժվար է պատկերացնել, որ այն կստանա Ռուսաստանից, բայց ինչ-որ մեկը պետք է մատակարարի այն»,- հավելել է նա։
Միցոտակիսն ավելի վաղ ասել էր, որ Հունաստանը կարող է օգնել Եվրոպային անկախանալ ռուսական բնական գազից: Երկրի կառավարությունը նախատեսում է ավելացնել ռուսական գազատարի փոխարեն հեղուկ գազի (LNG) գնումները և կառուցում է ենթակառուցվածքներ հեղուկ գազ (LNG) ստանալու համար։