2 րոպեի ընթերցում
ԵՐԵՎԱՆ, 2 ԴԵԿՏԵՄԲԵՐԻ, ԱՐՄԵՆՊՐԵՍ: Գերմանիայի կանցլեր Օլաֆ Շոլցը զանգահարել Է Վլադիմիր Պուտինին՝ Ուկրաինայի իրադրության հետ կապված տարբեր հարցեր քննարկելու համար: Այդ մասին «Արմենպրես»-ը տեղեկանում Է «ՌԻԱ Նովոստի» գործակալությունից:
Ըստ Կրեմլի մամուլի ծառայության տարածած հաղորդագրության՝ Մոսկվան քննադատել է արևմտյան պետությունների կողմից Կիևին զենքի մատակարարումները, ուկրաինացի զինվորականների պատրաստումը, ինչպես նաև քաղաքական ու ֆինանսական աջակցությունն Ուկրաինային, ինչը Կիևին ստիպում է հրաժարվել բանակցություններից:
Ռուսաստանի ղեկավարը հորդորել Է, որ Բեռլինը վերանայի իր մոտեցումներն ուկրաինական իրադարձությունների հարցում:
Հեռախոսազրույցի ընթացքում Պուտինը նշել Է, որ ռուսական բանակը երկար ժամանակ զերծ Է մնացել կետային հրթիռային հարվածներից Ուկրաինայի մի քանի թիրախների ուղղությամբ, բայց ստիպված Է եղել դրանք սկսել՝ ի պատասխան Ռուսաստանի քաղաքացիական ենթակառուցվածքի, ներառյալ՝ Ղրիմի կամրջի և Էներգետիկ օբյեկտների դեմ Կիևի գրոհների:
ՌԴ նախագահն այդ նույն շարքում նշել է ահաբեկչական գործողությունները «Հյուսիսային հոսքի» երկու գազատարներում:
Անհրաժեշտ Է անցկացնել դրանց միանգամայն թափանցիկ հետաքննություն՝ Ռուսաստանի ներկայացուցիչների մասնակցությամբ, հավելել են Կրեմլում:
Բացի այդ, Պուտինը և Շոլցը քննարկել են ուկրաինական հացահատիկի արտահանման և Ռուսաստանից պարենամթերքի ու պարարտանյութերի արտահանման ապաարգելափակման շուրջ Ստամբուլում կնքված գործարքի կատարումը: Մոսկվան նշել Է այդ համաձայնագրի բարեխիղճ և համալիր կատարման անհրաժեշտությունը: