2 րոպեի ընթերցում
ԵՐԵՎԱՆ, 29 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ ԿԳՄՍ նախարարությունում տեղի է ունեցել «100 գաղափար Հայաստանի համար» նորարարական նախագծերի և գիտատեխնիկական մշակումների համահայկական մրցույթի կազմկոմիտեի առաջին նիստը:
Ինչպես «Արմենպրես»-ը տեղեկանում է նախարարության տարածած հաղորդագրությունից, նիստը վարել է Երիտասարդական քաղաքականության, լրացուցիչ և շարունակական կրթության վարչության պետ Զարա Ասլանյանը:
Օրակարգային հարցերն էին՝ մրցույթի կարգով հաստատված 20 անվանակարգերից ընտրել մրցութային 5 անվանակարգ, ձևավորել փորձագիտական հանձնաժողով՝ բաղկացած 10 անդամներից, որոնք ընտրվում են կազմկոմիտեի կողմից՝ ըստ անվանակարգերի, սահմանել մրցույթի հայտերի ընդունման և մրցույթի արդյունքների հրապարակման ժամկետները:
Կազմկոմիտեի անդամները ծանոթացել են բոլոր անվանակարգերին և առանձնացրել դրանցից հինգը՝
ֆիզիկամաթեմատիկական գիտություններ, գյուղատնտեսական գիտություններ, քիմիական գիտություններ, ռազմական գիտություններ, տեղեկատվական տեխնոլոգիաներ:
Քննարկվել է նաև փորձագիտական խմբի անդամների ընտրության հարցը:
Նախանշվել են պետական և մասնավոր այն կառույցները, որոնց ներկայացուցիչները պետք է ընդգրկվեն որպես «100 գաղափար Հայաստանի համար» մրցույթում ներկայացված նախագծերը գնահատող փորձագետներ:
Փորձագիտական հանձնաժողովի ձևավորումից հետո կազմկոմիտեի մասնակցությամբ կհրավիրվի նիստ՝ հաստատելու հայտերի ընդունման ձևաչափին ներկայացվող պահանջները և գնահատման թերթիկի չափորոշիչները:
Նախնական պայմանավորվածությամբ՝ որոշվել է հայտերի ընդունման ժամկետը սահմանել մինչև 1 ամիս:
Նախարարությունից հայտնում են, որ «100 գաղափար Հայաստանի համար» նորարարական նախագծերի և գիտատեխնիկական մշակումների համահայկական մրցույթն ուղղված է երիտասարդների նորարարական մտածողության զարգացմանը, ՀՀ-ում սոցիալ-տնտեսական խնդիրների լուծմանը, երիտասարդների ներգրավմանը և քաղաքացիական նախաձեռնությունների խթանմանը: