Երևանի Օրբելու փողոց 23 հասցեի շենք-շինությունները և հողամասը ներկայացվել են օտարման

ԵՐԵՎԱՆ, 9 ՀՈՒՆԻՍԻ, ԱՐՄԵՆՊՐԵՍ։ ՀՀ ՏԿԵ նախարարության պետական գույքի կառավարման կոմիտեին ամրացված, պետական սեփականություն հանդիսացող Երևանի Օրբելու փողոց 23 հասցեում շենք-շինությունները և դրանց օգտագործման և սպասարկման համար հատկացված բաժնային սեփականություն հանդիսացող հողամասերը կներկայացվեն օտարման՝ մրցույթով՝ գնահատված արժեքի 80 տոկոսի չափով։ Ինչպես տեղեկացնում է «Արմենպրես»-ը, Կառավարության նիստին նախագիծը ներկայացրեց Տարածքային կառավարման և ենթակառուցվածքների նախարարի տեղակալ Վաչե Տերտերյանը։

Մասնավորապես, ներկայացված նախագծով առաջարկվում է ՀՀ ՏԿԵ նախարարության պետական գույքի կառավարման կոմիտեին ամրացված, պետական սեփականություն հանդիսացող քաղաք Երևան, Արաբկիր, Օրբելու փողոց 23 հասցեում գտնվող 9905.21 քառ. մետր մակերեսով շենք-շինությունները և դրանց օգտագործման և սպասարկման համար հատկացված 3.302955 հեկտար մակերեսով և 0.00436 քառ. մետր մակերեսով բաժնային սեփականություն հանդիսացող հողամասերը ներկայացնել օտարման՝ մրցույթով:

«Այս գույքը պետական կառավարման կոմիտեին է հանձնվել 2013 թվականին, նախկինում եղել է զինվորական հիվանդանոցի շենք-շինությունները և հողամասը։ Կառավարության 2020 թվականի համապատասխան որոշմամբ գույքը ներկայացվել է մեկ անգամ օտարման մրցույթով գնահատված արժեքի 100 տոկոսի չափով՝ 8,2 միլիարդ դրամ, սակայն մրցույթը չի կայացել հայտեր չլինելու պատճառով։ Հաշվի առնելով վերոնշյալը, այս նախագծով առաջարկվում է գույքը օտարել մրցույթով մեկնարկային գին սահմանելով գնահատված արեքի 80 տոկոսի չափով՝ շուրջ 6,6 միլիարդ դրամ ծավալով»,- ասաց Տերտերյանը։

Նախագծով սահմանվում է նաև, որ գույքի վաճառքի գինը գնորդները կարող են վճարել միանվագ, ինչպես նաև 5 տարիների ընթացքում, ներկայացված առաջարկները կհաշվարկվեն կշռային գործակիցներով, կտրվի առավելություն միանվագ վճարում կատարողին, որը հնարավորություն կստեղծի ավելի լայն մասնակիցների շրջանակ ներգրավվելու այս մրցույթային առաջարկին մասնակցելու համար։