Ոստիկանության ներդրումն անուրանալի է հայոց պետականության վերահաստատման գործում. Վահե Ղազարյանի ուղերձը
2 րոպեի ընթերցում
ԵՐԵՎԱՆ, 28 ՄԱՅԻՍԻ, ԱՐՄԵՆՊՐԵՍ: ՀՀ ոստիկանության պետ, ոստիկանության գեներալ-մայոր Վահե Ղազարյանը շնորհավորական ուղերձ է հղել Հանրապետության օրվա առթիվ: Ինչպես «Արմենպրես»-ին տեղեկացրին ՀՀ ոստիկանության հասարակայնության հետ կապերի և լրատվության վարչությունից, ուղերձում ասվում է.
«Հայաստանի Հանրապետության ծնունդը, հայոց պետականության վերականգնումն ու հաստատումը հայ ժողովրդի բազում սերունդների երազանքն էր, որ իրականություն դարձավ 1918 թվականի մայիսի 28-ին:
Իրականություն դարձավ Սարդարապատի, Բաշ Ապարանի, Ղարաքիլիսայի հերոսական ճակատամարտերի, հազարավոր հայորդիների մեծ սխրանքի, ինքնիշխան պետությանն իրենց կյանքը զոհաբերած մեր հայրենակիցների նվիրումի շնորհիվ:
Հայաստանի Հանրապետության հռչակումը շրջադարձային էր ողջ հայության համար: Անկախ պետականությունն այլևս համազգային գաղափար էր, որն աշխարհի հայերին ապրեցնում է արդեն դարից ավելի՝ բոլոր ձեռնարկները մղելով մեկ թիրախի, ապահովելով ազգային միասնականություն և միասնական նպատակներ:
Մեծ տոնի առթիվ շնորհավորում եմ Հայաստանի Հանրապետության ոստիկանության ողջ անձնակազմին, որի ներդրումն անուրանալի է հայոց պետականության վերահաստատման և ամրապնդման, հայրենիքի սահմանները պաշտպանելու, երկրում հասարակական կարգ և օրինականություն ապահովելու գործում:
Շնորհավորում եմ բոլորիդ ընտանիքներին, հարազատներին ու մերձավորներին:
Շնորհավորում եմ բոլորին ու բոլորիս՝ մեր պետության ծննդյան օրվա առթիվ և մաղթում խաղաղություն, շենացում, իրականացում մեր ազգային իղձերի ու ծրագրերի»: