Պեսկովը մեկնաբանել է Պետդումայի պատգամավորի հայտարարությունն Ադրբեջանին միջուկային հարված հասցնելու վերաբերյալ
2 րոպեի ընթերցում
ԵՐԵՎԱՆ, 29 ՄԱՐՏԻ, ԱՐՄԵՆՊՐԵՍ: Կրեմլում կոչ են անում ձեռնպահ մնալ Լեռնային Ղարաբաղի վերաբերյալ զգացմունքային արտահայտություններից, Ռուսաստանը ջանքեր է գործադրում իրավիճակը կարգավորելու համար:
Ինչպես տեղեկացնում է «Արմենպրես»-ը, վկայակոչելով «ՌԻԱ Նովոստի»-ն, այս մասին հայտնել է ՌԴ նախագահի մամուլի քարտուղար Դմիտրի Պեսկովը` մեկնաբանելով ռուսական հեռուստաալիքներից մեկի եթերում Ռուսաստանի Պետական Դումայի տնտեսական քաղաքականության հարցերով կոմիտեի փոխնախագահ Միխայիլ Դելյագինի` Ադրբեջանի նավթային արդյունաբերության ուղղությամբ միջուկային հարված հասցնելու հայտարարությանը:
«Այդ հայտարարությունը ոչ մի կերպ չի համապատասխանում և չի կարող համապատասխանել Ռուսաստանի Դաշնության պաշտոնական գծին։ Դա ավելի շուտ հայտարարություն է, որն ընկած է անձնական հույզերի հարթության վրա, որոնք վառ ձևով են արտահայտվել: Անշուշտ, մենք կոչ կանենք վերահսկել այդ հույզերը և զերծ մնալ նման հայտարարություններից, առավել ևս մեր գործընկերների նկատմամբ: Ադրբեջանը դասվում է մեր գործընկեր երկրների շարքին, առավել եւս այն պայմաններում, երբ Ռուսաստանը շատ եռանդուն ջանքեր է գործադրում Ղարաբաղում խաղաղության պահպանման և բոլոր կողմերի կողմից համապատասխան պարտավորությունների կատարման ուղղությամբ»,-ասել է Պեսկովը լրագրողներին: