Հաշմանդամություն ունեցող անձանց համար 20 կարևոր նշանակության շենք ամբողջությամբ կդառնա մատչելի

3 րոպեի ընթերցում

ԵՐԵՎԱՆ, 16 ՄԱՐՏԻ, ԱՐՄԵՆՊՐԵՍ: Երևանի 20 կարևոր նշանակության շենք ամբողջությամբ կդառնա մատչելի հաշմանդամություն ունեցող անձանց համար: ՀՀ քաղաքաշինության կոմիտեի կողմից ներկայացված նախագիծը հավանության է արժանացել ՀՀ կառավարության կողմից:

«Արմենպրես»-ի հետ զրույցում ՀՀ քաղաքաշինության կոմիտեի շինարարության և գիտատեխնիկական նորմավորման վարչության պետ Ռուզան Ադամյանը նշեց, որ ընտրվել են այն շենքերը, որոնք հանրության համար կարևոր նշանակություն ունեն և այցելուներ շատ են լինում: Մասնավորապես, Երևանի մետրոպոլիտենի կայարանները, Ալեքսանդր Սպենդիարյանի անվան օպերայի և բալետի ազգային ակադեմիական թատրոնի, Գ. Սունդուկյանի անվան ազգային ակադեմիական թատրոնի, Մատենադարանի, Հայաստանի ազգային պատկերասրահի, Հայաստանի ազգային գրադարանի, Կարեն Դեմիրճյանի անվան Երևանի մարզահամերգային համալիրի շենքերը, երկաթուղային կայարաններ, գերատեսչական տարբեր շենքեր և այլն:

«Խոսքը մեկ կամ երկու խնդրի մասին չէ: Նախատեսվում է համալիր մոտեցում ամբողջ շենքում: Ծրագիրը ենթադրում է և՛ թեքահարթակներ, և՛ վերելակներ, և՛ համապատասխան պայմաններով սանհանգույցներ: Լսողական, տեսողական խնդիրներ ունեցող անձանց համար համապատասխան պայմաններ ապահովելու ուղղությամբ ևս աշխատանքներ են տարվելու»,-ասաց Ռուզան Ադամյանը:

Քաղաքաշինության կոմիտեի ներկայացուցիչը նկատեց, որ նշված բոլոր շենքերը կառուցվել են դեռ խորհրդային տարիներին: Դրանցից շատերում ի սկզբանե չեն եղել համապատասխան պայմաններ հաշմանդամություն ունեցող անձանց համար: Տարիների ընթացքում պետական բյուջեի միջոցներով մի շարք շենքեր հիմնանորոգվել ու վերանորոգվել են: Այդ աշխատանքներում հաշվի է առնվել հաշմանդամություն ունեցող անձանց խնդիրները, սակայն համալիր մոտեցում չի եղել: Հիմա ՀՀ քաղաքաշինության կոմիտեի ծրագրով խնդրին համալիր մոտեցում է տրվելու:

«Յուրաքանչյուր շենքին առանձին մոտեցում է տրվելու: Շատ պատասխանատու, կարևոր աշխատանք է սպասվում: Մենք գործ ենք ունենալու արդեն գոյություն ունեցող շենք-շինությունների հետ, և դրանցում փոփոխություններ կատարելը կուղղորդվի որոշակի դժվարություններով: Այդ շենքերը հուշարձանային համալիրներ են»,-ասաց Ռուզան Ադամյան:

Առաջիկայում սպասվում են ծրագրի հետ կապված քննարկումներ, առաջարկների ընդունում, նախագծանախահաշվարկային փաստաթղթերի պատրաստում: Գործնականում շինարարական աշխատանքները կսկսվեն 2024 թվականին:

Սա պիլոտային ծրագիր է: Այն մայրաքաղաքում հաջողությամբ իրականացնելուց հետո ընդգրկվելու են կարևոր նշանակության քաղաքաշինական օբյեկտներ նաև Հայաստանի մյուս քաղաքներից, համայնքներից:

Աննա Գզիրյան

Հայերեն

Փաշինյանը վերահաստատել է Ղարաբաղյան շարժումից հրաժարվելու իր դիրքորոշումը

Հանրապետության տարածքում առաջիկա օրերին օդի ջերմաստիճանն էապես չի փոխվի

Վարչապետը զգուշացրել է նաև գործող իշխանության ներկայացուցիչներին հափշտակությունների համար պատասխանատվության մասին

Ֆիզիկայի ատեստավորման արդյունքները բավականին ցածր են, բոլոր բողոքները մանրամասն կդիտարկվեն. Ժաննա Անդրեասյան

ԱՄՆ նախագահն ու Կանադայի վարչապետը Շենժենում քննարկել են առևտրային համաձայնագիրը

Վարչապետը հայտնել է Թուրքիա էլեկտրաէներգիայի ուղիղ արտահանման ցանկության մասին

Վարչապետը պաշտպանել է Ադրբեջանի և Թուրքիայի հետ համագործակցելու կառավարության քաղաքականությունը

Կոպեկ գողացողներին ուղարկելու ենք քրեակատարողական հիմնարկներ. ՀՀ վարչապետ

Հովտաշատի դպրոցի շինարարությունը նախատեսվում է ավարտել մինչև փետրվար. Ժաննա Անդրեասյան

Հայ-վրացական համայնքային կապերի ամրապնդում՝ եվրոպական ինտեգրման ընդհանուր տեսլականով․ ստորագրվել է համագործակցության հուշագիր