Տիգրան Աբրահամյանը ստեղծված իրավիճակում չի բացառում ՀԱՊԿ-ՆԱՏՕ բախումը

ԵՐԵՎԱՆ, 1 ՄԱՐՏԻ, ԱՐՄԵՆՊՐԵՍ: ՀՀ ազգային ժողովի ընդդիմադիր «Պատիվ ունեմ» խմբակցության պատգամավոր Տիգրան Աբրահամյանը, Ուկրաինայում ստեղծված իրավիճակը նկատի ունենալով, չի բացառում ՀԱՊԿ-ՆԱՏՕ ուղիղ բախումը, ինչը Հայաստանի համար լի է սպառնալիքներով: «Արմենպրես»-ի հաղորդմամբ՝ Աբրահամյանը նման տեսակետ հայտնեց ԱԺ հայտարարությունների ժամին:

«Ուկրաինայի շուրջ ստեղծված ծանր իրադրությունը, աշխարհում բարձր տեմպ վերցրած սպառազինությունների մրցավազքը, ահաբեկչական ծայրահեղական կազմակերպությունների խմբերի ակտիվացումն ու կենտրոնացումը Եվրասիական տարածաշրջանում, միջուկային զենքի հնարավոր կիրառման հարցը միջազգային օրակարգի առաջնային քննարկման առարկա դառնալը հուշում է, որ պայթյունը միայն Ուկրաինայով չի սահմանափակվելու: Եթե նկատի ենք առնում այն հանգամանքը, որ մեր տարածաշրջանում գործող ավանդական, հիմնական կամ պոտենցիալ դերակատարները, ուկրաինական ճգնաժամով պայմանավորված, ագրեսիվ դիմակայության փուլում են, աստիճանաբար տեսանելի է դառնում ՀԱՊԿ-ՆԱՏՕ անուղղակի և չի բացառվում նաև ուղիղ բախումը, ապա առավել հստակ է դառնում, թե Հայաստանի գլխին ինչ նոր սպառնալիքներ են կախված»,-ասաց Աբրահամյանը:

Նա նշեց՝ տարբեր զարգացումների վերլուծությունը ցույց է տալիս, որ Հայաստանի ու Արցախի շուրջ ձևավորված հետպատերազմյան անվտանգային միջավայրն առավել մուգ գույներ է ստանում, շփման գծում իրադրությունը կարող է լուրջ փոփոխությունների ենթարկվել: Ըստ պատգամավորի՝ այս փուլում դրանք կարող են դրսևորվել Հայաստանի ու Արցախի սահմաններին տարբեր բնույթի սադրանքներով, մեծամասշտաբ զորավարժություններով, զորքերի կուտակումներով, մեկ այլ փուլում՝ բարձր ռիսկ կա, որ դրանք կարող են ունենալ առավել ագրեսիվ, թիրախային ու մասշտաբային մակարդակ:

«Հարավային Կովկասն այն հիմնական ճակատներից է, որը կարող է բացվել ՌԴ-Արևմուտք դիմակայության պայմաններում, իսկ ճակատի առաջին շարքերում Թուրքիան և Ադրբեջան են»,-ասաց Աբրահամյանը:

Պատգամավորի գնահատմամբ՝ ստեղծված բարդ ու աննախադեպ ծանր իրադրությունում ՀՀ իշխանությունը անհասկանալի կեցվածք է ընդունել՝ փոխանակ նախապատրաստվի համապատասխան սցենարային զարգացումներին: Նա մատնանշեց հատկապես ԳՇ պետի ազատումը:

«Գլխավոր շտաբի պետի պաշտոնում նշանակում չի եղել, ու սա այն դեպքում, որ ստեղծված բարդ ռազմաքաղաքական իրադրության պայմաններում ամենից ծանրաբեռնվածը հենց Զինված ուժերի Գլխավոր շտաբն է գործում»,-նշեց Աբրահամյանը:

Ըստ նրա՝ ԳՇ պետի պաշտոնում նույնիսկ ամենալավ կադրի նշանակման դեպքում նրան երկար ժամանակ է պետք լինելու՝ իրավիճակը իր ձեռքը վերցնելու ու անվտանգային համակարգի զարկերակին տիրապետելու համար: