3 րոպեի ընթերցում
ԵՐԵՎԱՆ, 1 ՓԵՏՐՎԱՐԻ, ԱՐՄԵՆՊՐԵՍ: «FlyOne Armenia» ավիաընկերությունը պատրաստ է Երևան- Ստամբուլ-Երևան ուղղությամբ առաջին չվերթի իրականացմանը, որը կայանալու է փետրվարի 2-ին: Բոլոր նախապատրաստական աշխատանքներն արված են, հակահամաճարակային միջոցառումները հաշվի են առնված: Երևան- Ստամբուլ- Երևան երթուղով չվերթերի նկատմամբ հետաքրքրություն կա: «Արմենպրես»-ի հետ զրույցում «FlyOne Armenia» ավիաընկերության խորհրդի նախագահ Արամ Անանյանը նշեց, որ ներկայում չվերթի առնչությամբ առկա աշխուժության մակարադակը համապատասխանում է ընկերության նախնական կանխատեսումներին:
«Մենք կարևորում ենք այս ուղղությամբ օդային հաղորդակցության վերականգնումը՝ փոխադարձության հիմքի վրա։ Ինչպես արդեն առիթ ունեցել ենք նշելու, այն շատ լավ հնարավորություն է պոլսահայ համայնքի և Մայր հայրենիքի միջև կապն ամրացնելու համար»,-ասաց Արամ Անանյանը:
Ավիաընկերության ուշադրության կենտրոնում են հակահամաճարակային միջոցառումները։ Օդանավում դիմակ կրելը պարտադիր է լինելու։ Ինքնաթիռները հագեցած են HEPA օդային զտիչներով, որոնք ոչնչացնում են վիրուսների և բակտերիաների 99,97 տոկոսը: Արամ Անանյանն ընդգծեց՝ ուղևորների առողջությունն ու անվտանգությունն իրենց համար առաջնահերթություն է։
Սկզբնական շրջանում նախատեսված է Երևան- Ստամբուլ- Երևան ուղղությամբ շաբաթական երկու չվերթ իրականացնել: Չվերթի համար նախատեսված օրերն են՝ երկուշաբթին և ուրբաթը: Առաջիկայում ավիաընկերությունը նախատեսում է Երևան- Ստամբուլ- Երևան երթուղով իրականացնել շաբաթական երեք թռիչք՝ երկուշաբթի, չորեքշաբթի և ուրբաթ օրերին։
«FlyOne Armenia» ընկերությունը դիմել էր թե՛ Հայաստանի, թե՛ Թուրքիայի ավիացիոն իշխանություններին Երևան-Ստամբուլ-Երևան երթուղով չվերթներ իրականացնելու համար: Հայաստանի և Թուրքիայի ավիացիոն իշխանությունները բավարարել են ընկերության հայտը: Նույն ուղղությամբ շաբաթական երկու չվերթ իրականացնելու թույլտվություն է ստացել նաև թուրքական Pegasus ավիաընկերությունը:
«FlyOne Armenia» ավիաընկերությունը 2021 թվականի նոյեմբերի 12-ին և 15-ին ստացել է Ավիացիայի միջազգային կազմակերպության (ICAO) և Օդային տրանսպորտի միջազգային ասոցիացիայի (IATA) նույնականացման ծածկագրերը: Ավիաընկերության նավատորմը բաղկացած է Airbus A320 ընտանիքի ինքնաթիռներից։