Կարեն Անդրեասյանն իր պաշտոնավարման ընթացքում հնարավոր է համարում վեթինգի առաջին դրսևորումները
1 րոպեի ընթերցում
ԵՐԵՎԱՆ, 30 ՍԵՊՏԵՄԲԵՐԻ, ԱՐՄԵՆՊՐԵՍ: Արդարադատության նախարար Կարեն Անդրեասյանն իր պաշտոնավարման ընթացքում հնարավոր է համարում վեթինգի առաջին դրսևորումները: «Արմենպրես»-ի հաղորդմամբ, այդ մասին Անդրեասյանը նշեց կառավարության նիստից հետո լրագրողների հետ զրույցում:
«Դա միակողմանի գործընթաց չէ. այստեղ կարևոր է նաև Բարձրագույն դատական խորհրդի (ԲԴԽ) մոտեցումը: Իմ կարծիքով` ԲԴԽ-ն քիչ է դատավորին պատասխանատվության ենթարկել: Վերջին շրջանում որոշ դատավորների նկատմամբ Խորհուրդն անընդհատ մերժում էր մեր միջնորդությունները: Այսինքն, չի կարելի ասել, որ ԲԴԽ-ն կառավարության դիրքորոշման նման դիրքորոշում ունի»,- ասաց նա՝ ավելացնելով, որ դատավորի նկատմամբ շատ ավելի կարգապահական վարույթներ է հարուցելու, ավելի ուշադիր է լինելու նրանց կողմից թույլ տրված խախտումների նկատմամբ:
«Դրա համար ես էլ ավելի շատ աշխատակիցներ եմ ընդունել: Ես գործեր եմ հարուցում ոչ թե ելնելով նրանից, որ ինչ-որ մեկին դա կարող է դուր գալ կամ չգալ, այլ` նրանից` արդյոք դատավորը սխալ թույլ է տալիս, թե ոչ: Ես քաղաքական նկատառումներից չեմ ելնում»,- ընդգծեց Անդրեասյանը: