1 րոպեի ընթերցում
ԵՐԵՎԱՆ, 16 ՕԳՈՍՏՈՍԻ, ԱՐՄԵՆՊՐԵՍ։ Ադրբեջանի պաշտպանության նախարար Զաքիր Հասանովը Թուրքիայի ՊՆ նախարար Հուլուսի Աքարի հրավերով մեկնում է Թուրքիա։
Այս մասին, ինչպես հաղորդում է «Արմենպրես»-ը, հայտնում են ադրբեջանական ԶԼՄ-ները։
Զաքիր Հասանովը Ստամբուլում մասնակցելու է IDEF-2021 պաշտպանական արտադրանքների միջազգային ցուցահանդեսին։ Ցուցահանդեսից բացի, ադրբեջանցի նախարարը թուրքական պաշտոնական շրջանակների հետ կունենա նաև մի շարք հանդիպումներ։
Ցուցահանդեսն անցկացվելու է օգոստոսի 17 -20 -ը Ստամբուլի TÜYAP կենտրոնում: Ցուցահանդեսը կազմակերպում է Թուրքիայի պաշտպանության նախարարությունը՝ նախագահի աշխատակազմի հովանու ներքո: Մասնակից ընկերությունների քանակով IDEF-ը տարբեր երկրներում կազմակերպվող պաշտպանական 32 ցուցահանդեսների շարքում զբաղեցնում է աշխարհում երրորդ տեղը: Ցուցահանդեսին ներկայացվելու է աշխարհի 53 երկրների 1236 պաշտպանական ընկերությունների արտադրանքի լայն տեսականի, որոնցից 536-ը լինելու են թուրքական: Ակնկալվում է, որ ցուցահանդեսին կմասնակցի 154 պատվիրակություն աշխարհի 79 երկրներից: Կանցկացվեն բազմաթիվ բանակցություններ, կկնքվեն նոր պայմանագրեր, կցուցադրվեն նոր արտադրանքներ։