«Ազատ Հայրենիք» դաշինքը քարոզարշավի երթ է անցկացրել Կոտայքի մարզի երեք քաղաքներում

ԵՐԵՎԱՆ, 9 ՀՈՒՆԻՍԻ, ԱՐՄԵՆՊՐԵՍ: «Ազատ Հայրենիք» դաշինքը հունիսի 9-ին քարոզարշավ է անցկացրել Աբովյան, Հրազդան և Չարենցավան քաղաքներում։

Ինչպես «Արմենպրես»-ին տեղեկացրին «Ազատ Հայրենիք»-ից, դաշինքի թեկնածուները և աջակիցները երթով անցել են քաղաքների մարդաշատ վայրերով, կոչ արել ճիշտ ընտրություն կատարել հունիսի 20-ին՝ քվեարկել «Ազատ Հայրենիք» դաշինքի օգտին։

Ըստ աղբյուրի՝ քաղաքացիները դիմել են դաշինքի ղեկավարներին իրենց առավել հուզող հարցերով, առավել հաճախ՝ Հայաստանի անվտանգության վերականգնման և Արցախի հետագա ճակատագրի վերաբերյալ։

«Հանգամանորեն ներկայացվեցին «Ազատ Հայրենիքի» մոտեցումները, մասնավորապես՝ միակողմանի արտաքին կողմնորոշման հաղթահարումը, ռազմական պոտենցիալի վերականգնումը և Արցախի անկախության միջազգային ճանաչումը»,- ասվում է հաղորդագրության մեջ։