2 րոպեի ընթերցում
ԵՐԵՎԱՆ, 11 ՀՈՒՆՎԱՐԻ, ԱՐՄԵՆՊՐԵՍ: Ադրբեջանի նախագահ Իլհամ Ալիևը ժամանել է Մոսկվա` ՀՀ վարչապետ Նիկոլ Փաշինյանի և Ռուսաստանի Դաշնության նախագահ Վլադիմիր Պուտինի հետ հանդիպման համար: «Արմենպրես»-ի փոխանցմամբ` այս մասին ՏԱՍՍ-ին հայտնել է Մոսկվայում Ադրբեջանի դեսպան Փոլադ Բյուլբյուլoղլին:
«Ադրբեջանի նախագահը ժամանել է Մոսկվա, որտեղ նրան դիմավորել է Ռուսաստանի Դաշնության փոխարտգործնախարար Անդրեյ Ռուդենկոն, ԱԳՆ-ի և Մոսկվայում Ադրբեջանի դեսպանության ներկայացուցիչները: Այս պահին Ալիևի ավտոշարասյունն ուղևորվում է դեպի Կրեմլ»,-ասել է նա:
Մոսկվա է ժամանել նաև ՀՀ վարչապետ Նիկոլ Փաշինյանը:
Հունվարի 11-ին Մոսկվայում նախատեսված է Հայաստանի Հանրապետության վարչապետ Նիկոլ Փաշինյանի, Ռուսաստանի Դաշնության նախագահ Վլադիմիր Պուտինի և Ադրբեջանի Հանրապետության նախագահ Իլհամ Ալիևի եռակողմ հանդիպումը: Այցի շրջանակում վարչապետը նաև առանձնազրույց կունենա ՌԴ նախագահի հետ:
ՀՀ վարչապետի մամուլի խոսնակ Մանե Գևորգյանը հայտնել է, որ եռակողմ հանդիպման նախապես պլանավորված օրակարգը տնտեսական բնույթ ունի, որը վերաբերվում է տարածաշրջանային կոմունիկացիաների բացմանը, միջազգային բեռնափոխադրումների իրականացմանը՝ այդ թվում Հայաստանից դեպի Ռուսաստանի Դաշնություն, Իրանի Իսլամական Հանրապետություն, ինչպես նաև Հայաստանի կենտրոնական հատվածներից Նախիջևանի երկաթուղով դեպի Սյունիքի մարզ: