Դադարե՛ք անտեսել, ճանաչե՛ք Արցախի անկախությունը.ԱՄՆ դեսապանատան դիմաց բողոքի ակցիա է ընթանում
3 րոպեի ընթերցում
ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: Բազմաթիվ քաղաքացիներ Երևանում Ամերիկայի Միացյալ Նահանգների դեսպանատան դիմաց բողոքի ակցիա են կազմակերպել՝ ԱՄՆ-ի ուշադրությունը հրավիրելով Արցախում թուրք-ադրբեջանական ուժերի, սիրիացի վարձկանների վայրագրությունների վրա, պահանջելով, որ ԱՄՆ դեսպանը կամ դեսպանատան որևէ ներկայացուցիչ այցելի Ստեփանակերտ, Շուշի և այլ քաղաքներ՝ տեսնելու և արձանագրելու այդ վայրագրությունների արդյունքները: Ցուցարարները պահանջում են նաև ճանաչել Արցախի անկախությունը:
«Արմենպրես»-ի հաղորդմամբ՝ կրթության փորձագետ Անահիտ Բախշյանը, մասնավորապես, ասաց. «Հայաստանն այսօր Արցախի հետ միասին կռիվ է տալիս ահաբեկչական Թուրքիայի, Ադրբեջանի և սիրիական ահաբեկիչների դեմ: Դուք չեք կարող անտարբեր նայել այս ամենին, դուք իրավունք չունեք ուղղակի»:
Նա շեշտեց՝ եթե այս ամենը չկանխվի, այդ ահաբեկիչները կհասնեն նաև ԱՄՆ: Հավաքվածները նշեցին, որ այդ ահաբեկիչների դեմ այսօր պարիսպ է կանգնեցնում հայ ժողովուրդը: Նրանք հարց բարձրացրին՝ ինչո՞ւ ՀՀ-ում ԱՄՆ դեսպանը չի այցելում Ստեփանակերտ, Շուշի, Հադրութ և այլ քաղաքներ՝ տեսնելու ադրբեջանական կողմի վայրագրությունները: «Ո՞վ խոսեց Ստեփանակերտի, Շուշիի, Հադրութի մասին, ո՞վ խոսեց ավերված եկեղեցու մասին»,- նշեցին հավաքվածները:
Նրանք կոչ են անում անմասն չմնալ հայ ժողովրդի ցավին, դադարեցնել Ադրբեջանի և Թուրքիայի ագրեսիան: Ցույցի մասնակիցները վանկարում են. «Դեսպան, դուրս արի», «Ճանաչեք Արցախը», «Կանգնեցրեք ցեղասպանությունը»: Բարձրացված պաստառների վրա գրված է. «Ճանաչել Արցախը», « Ձեր լռությունը՝ նոր ցեղասպանություն», «Կագնեցնել Թուրքիայի ահաբեկչությունը», «Ալիև՝ ահաբեկիչ, Էդրողան՝ ահաբեկիչ» : Հավաքվածները շեշտադրում են, որ եթե այս ահաբեկչությունն այստեղ չկանխվի, տարածվելու է աշխարհով մեկ: Ցույցի մասնակիցները հայերեն և անգլերեն ելույթներ են ունենում, կոչեր անում, երգում հայրենասիրական երգեր, պահանջում, որ դեսպանատան ներկայացուցիչը դուրս գա՝ հանդիպելու իրենց և լսելու իրենց պահանջը:
Դեսպանատնից համաձայնեցին, որ հավաքվածներից երեք հոգի հանդիպեն իրենց ներկայացուցչի հետ՝ փոխանցելու բոլորի պահանջը: Դեսպանատնից, սակայն, թույլ չտվեցին, որ լրատվամիջոցները ներկա գտնվեն հանդիպմանը:
Աննա Գրիգորյան