Տիկնիկային թատրոնը հյուրընկալել է իրենց բնակավայրերից ժամանակավորապես հեռու գտնվող երեխաներին
2 րոպեի ընթերցում
ԵՐԵՎԱՆ, 8 ՀՈԿՏԵՄԲԵՐԻ, ԱՐՄԵՆՊՐԵՍ: Ադրբեջանի՝ Արցախի դեմ սանձազերծած ռազմական գործողություններով պայմանավորված՝ Հայաստանի Հանրապետության կրթամշակութային հաստատությունները պարբերաբար կազմակերպում են բովանդակային տարբեր ծրագրեր իրենց բնակավայրերից ժամանակավորապես հեռու գտնվող երեխաների ժամանցն ապահովելու համար:
Արմենպրես»-ի հաղորդմամբ՝ Երևանի Հ. Թումանյանի անվան պետական տիկնիկային թատրոնը նույնպես հյուրընկալել է Արցախից Հայաստան եկած փոքրիկների, որոնք թատրոնում դիտել են Հովհաննես Թումանյանի «Անխելք մարդը» հեքիաթի բեմադրությունը:
Ներկայացումը երեխաների հետ դիտել է նաև ՀՀ ԿԳՄՍ նախարարի տեղակալ Արա Խզմալյանը:
«Այսօր դուք եք մեր հյուրը, մյուս անգամ էլ մենք կհյուրընկալվենք ձեզ, որովհետև մենք միշտ միասին ենք: Մենք ձեզ շատ ենք սիրում և չենք պատկերացնում մեր կյանքն առանց ձեզ՝ հրաշալի, սիրուն, խելացի բալիկներ»,- երեխաներին ջերմորեն դիմել է թատրոնի տնօրեն Ռուբեն Բաբայանը և հավելել՝ խաղաղության հաստատումից անմիջապես հետո Երևանի Հ. Թումանյանի անվան պետական տիկնիկային թատրոնն առաջինը կայցելի նրանց՝ նոր ներկայացմամբ:
Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ ռազմական գործողություններ է սկսել: Հրետակոծվում և հրթիռակոծվում են նաև խաղաղ բնակավայրերը, այդ թվում՝ մայրաքաղաք Ստեփանակերտը և Շուշին: Ադրբեջանի ԶՈՒ-ն թիրախավորել է նաև ՀՀ զինվորական և քաղաքացիական ենթակառուցվածքները: Շփման գծում ընթացող համառ մարտերում երկու կողմն ունեն մարդկային ուժի և սպառազինության կորուստներ. ադրբեջանական կորուստները մի քանի անգամ գերազանցում են հայկական կողմինը: Հայտնաբերվել են Թուրքիայի ներգրավվածության, Սիրիայից ահաբեկչական խմբավորումների վարձկանների տեղափոխման և Արցախի դեմ օգտագործմանփաստեր: