11 րոպեի ընթերցում
ԵՐԵՎԱՆ, 6 ՄԱՅԻՍԻ, ԱՐՄԵՆՊՐԵՍ: Աշխարհում նոր տիպի կորոնավիրուսային վարակով՝ COVID-19-ով վարակվածների թիվն անցել է 3 միլիոն 753 հազար 689-ը: «Արմենպրես»-ի փոխանցմամբ՝ կորոնավիրուսի հետազոտական կենտրոնների տվյալների համաձայն՝ մահացածների թիվն անցել է 259 հազարը: Ապաքինվել է 1 միլիոն 256 հազար 580 մարդ:
Վիրուսով վարակվածների թվով առաջին տեղում հայտնված ԱՄՆ-ում 1 մլն 238 հազար 459 հաստատված դեպք կա: Այստեղ մահացածների թիվը 72 հազար 285 է: Այս ցուցանիշով ևս ԱՄՆ-ն առաջինն է աշխարհում: Ընդհանուր ցուցանիշով երկրորդ տեղում գտնվող Իսպանիայում հաստատված դեպքերի թիվը 253 հազար 682 է: Մեկ օրում 3 հազարից ավելի վարակվածության նոր դեպք է գրանցվել: Մահացության ցուցանիշը կազմում է 25 հազար 857:
Իտալիան վարակվածների թվով երրորդն է: Այստեղ հաստատված դեպքերի ընդհանուր թիվը 213 հազար 013 է: Վարակից մահացել է 29 հազար 315 մարդ։ Կորոնավիրուսից վարակվածության ցուցանիշով հաջորդը Մեծ Բրիտանիան է, որը շրջանցել էր Ֆրանսիային: Մեծ Բրիտանիայում հաստատված դեպքերի թիվը կազմում է 194 հազար 990: Վարակի հետևանքով մահացել է 29 հազար 427 մարդ: Մահացության ցուցանիշով Մեծ Բրիտանիան քիչ տարբերությամբ շրջանցեց Իտալիային՝ Եվրոպայում դառնալով առաջինը, աշխարհում՝ երկրորդը, ԱՄՆ-ից հետո: Մեծ Բրիտանիային հաջորդում է Ֆրանսիան, որտեղ գրանցվել է 170 հազար 551 հաստատված դեպք, մահացել է 25 հազար 531 մարդ:
Գերմանիայում 167 հազար 007 հաստատված դեպք կա, մահացածների ընդհանուր թիվը 6 հազար 993 է: Վարակվածների ընդհանուր թվով Գերմանիային հաջորդում է Ռուսաստանը, որը շրջանցել էր Թուրքիային: Այստեղ վարակվածության ընդհանուր թիվը կազմում է 165 հազար 929: Վերջին մեկ օրում այստեղ գրանցվել է 10 հազարից ավելի նոր դեպք: Երկրում մահացածների ընդհանուր թիվը 1537 է:
Թուրքիայում վարակակիրների թիվը հասել է 129 հազար 491-ի, մահացածներինը՝ 3 հազար 520-ի: Վարակվածների ընդհանուր թվով հաջորդ տեղում Բրազիլիան է 116 հազար 299 հաստատված դեպքով: Մահերի թիվը կազմում է 7 հազար 966: Իրանում վարակվածների թիվը հասել է 101 հազար 650 է: Երկրում վարակի բռնկումից ի վեր կորոնավիրուսի հետևանքով մահացել է 6 հազար 418 մարդ: Վարակվածության ընդհանուր ցուցանիշով վարակի ծագման երկիր Չինաստանն առանձնանում է 82 հազար 883 ընդհանուր, 2 նոր դեպքով։ Չինաստանում մահացել է 4 հազար 633 մարդ։ Վերջին օրերին այստեղ վարակի հետևանքով մահ չի գրանցվել:
Վրաստանում հաստատված դեպքերի թիվը հասել է 610-ի, վարակի բռնկումից ի վեր այստեղ մահացել է 9 մարդ:
Արաբական երկրներից վարակվածների թվով ԱՄԷ-ին շրջանցած Կատարում հաստատված դեպքերի թիվը կազմում է 17 հազար 972, մահերինը՝ 12-ը: ԱՄԷ-ում վարակվածների ընդհանուր թիվը 15 հազար 192 է, մահացածներինը՝ 146:
Եգիպտոսում 7 հազար 201 հաստատված դեպք կա, մահացել է 452 մարդ: Քուվեյթում վարակվածների թիվը հասել է 6 հազար 289-ի, մահացածներինը՝ 42-ի: Իրաքում գրանցվել է 2 հազար 431 վարակվածության, 102 մահվան դեպքով: Լիբանանում կա 750 վարակի հաստատված դեպք: Մահացության ցուցանիշը կազմում է 25: Սիրիայում վարակվածների թիվը հասել է 45-ի: Մահացել է 3 մարդ:
Առողջապահության համաշխարհային կազմակերպության տվյալներով՝ վարակ արձանագրած երկրների և տարածքների թիվն անցել է 212-ը:
ՌԴ մշակույթի նախարարի մոտ կորոնավիրուս է հաստատվել
Ռուսաստանի մշակույթի նախարար Օլգա Լյուբիմովան վարակվել է կորոնավիրուսով:
«Արմենպրես»-իհաղորդմամb, «ՌԻԱ Նովոստի»-ին տեղեկացրել են նախարարության լրատվական ծառայությունից:
Ավելի վաղ Միխայիլ Միշուստինը տեղեկացրել էր, որ իր մոտ կորոնավիրուս է հայտնաբերվել: Նա հայտնել էր, որ պետք է մեկուսանա և հետևի բժիշկների ցուցումներին: Վարչապետի պարտականությունները ժամանակավորապես կատարում է առաջին փոխվարչապետ Անդրեյ Բելոուսովը:
Գերմանիայում չեն բացառել արտերկրում իրենց քաղաքացիների հանգիստը կազմակերպելու տարբերակը
Գերմանիայի կառավարության տուրիզմի գծով ներկայացուցիչ Թոմաս Բարաիսը չի բացառել այն, որ իրենց քաղաքացիները ամռանը հանգիստը կազմակերպեն արտերկրում, եվրոպական այլ երկրներում: «Արմենպրես»-ի հաղորդմամբ, այս մասին տեղեկացնում է «ՌԻԱ Նովոստի»-ն: Նրա խոսքով, եթե կորոնավիրուսի հետ կապված իրավիճակը չփոխվի, ապա հանգիստը հնարավոր կլինի կազմակերպել Գերմանիայում կամ հարևան երկրներում:
«Դա վերաբերում է Ավստրիային, Ֆրանսիային, Բելգիային, Լեհաստանին, Նիդերլանդներին, որտեղ կարելի է գնալ ավտոմեքենայով: Բայց ես չէի բացառի Եվրոպայի մյուս շրջանները ևս, օրինակ, Բալեարյան, հունական կղզիներ, եթե իհարկե, այնտեղ նոր դեպքեր չլինեն և կաշխատի բժշկական աջակցություն»,-ասել է նա:
Նշվում է, որ նախորդ շաբաթ Անգելա Մերկելը տեղեկացրել էր, որ այդ հարցը օրակարգային չէ:
ԵՄ-ի տնտեսությանը սպասում է խոր անկում. Եվրահանձնաժողով
Եվրահանձնաժողովը հայտնում է, որ Եվրամիությանը սպասում է աննախադեպ տնտեսական անկում: Ենթադրվում է, որ անդամ երկրներում միագումար ՀՆԱ-ի անկումը կլինի ավելի քան 7 տոկոս:
«Արմենպրես»-ի հաղորդմամբ, «Euronews»-ը տեղեկացնում է, որ երբ Գերմանիայում, Ֆրանսիայում, Իտալիայում, Իսպանիայում և այլ երկրներում մտցվեց կարանտինի ռեժիմ, նախնական ոչ պատոնական գնահատականներով կանխատեսվում էր, որ ապրանքների արտադրության և ծառայությունների ոլորտում անկումը կլինի 2,5 տոկոսի չափով: Ավելի ուշ այդ թվերը մի քանի անգամ վերանայվեցին:
Մայիսի 6-ին Եվրահանձնաժողովը հրապարակեց առաջին պաշտոնական կանխատեսումն այն մասին, թե ինչ է սպասում Եվրոպային առաջիկա ամիսներին:
Մասնագետները նշում են, որ տնտեսության վերականգնումը կսկսվի հաջորդ տարի, սակայն «այն թույլ չի տա փոխհատուցել անկումը»:
Մեկուսացման ռեժիմի հետևանքով ֆրանսիացիների կեսից ավելին գիրացել է
Ֆրանսիայում մեկուսացումը մեծ թվով մարդկանց շրջանում հանգեցրել է քաշի ավելացման խնդրի: Երկրի 57 տոկոսից ավելին ավելորդ քաշ է ձեռք բերել, 29 տոկոսի դեպքում հակառակն է տեղի ունեցել՝ գրանցվել է քաշի կորուստ: «Արմենպրես»-իհաղորդմամբ, այս մասին տեղեկացնում է «Ինտերֆաքս»-ը՝ ներկայացնելով Հասարակական կարծիքի ուսումնասիրման ինստիտուտի հետազոտության տվյալները:
Նշվում է, որ ֆիզիկական ակտիվության պակասը, սթրեսները, պարբերաբար սնվելը հանգեցրել է գիրացման: Ուսումնասիրությունները ցույց են տալիս, որ մարդիկ միջինը 2.5 կգ ավել քաշ են հավաքել: Այս ընթացքում ֆրանսիացիների մոտ ավելացել է շոկոլադի և թեթև ալկոհոլային խմիչքների պահանջարկը:
Ըստ հետազոտությունների՝ քաշի ավելցուկ գրանցվել է այն մարկանց մոտ, ովքեր մեծ ընտանիքներով են ապրում: Այդ երևույթը քիչ է վերաբերում այն մարդկանց, ովքեր միայնակ են ապրում: Հարցմանը մասնակցած քաղաքացիները նշել են, որ կարանտինի ռեժիմը հանելուց հետո հակված են վերադառնալու ավելի առողջ սննդակարգի:
ԱՄՆ-ի տնտեսությունը վերագործարկելու ժամանակն է. Դոնալդ Թրամփ
ԱՄՆ նախագահ Դոնալդ Թրամփը հայտարարել է, որ ժամանակն է վերագործարկելու երկրի տնտեսությունը, նույնիսկ եթե դա նշանակում է, որ կորոնավիրուսի հետևանքով մահերի թիվն ավելանում է: «Այս ամենից ինչ-որ մեկը տուժում է, այո, բայց մենք պետք է բացենք մեր տնտեսությունը»,- ասել է նա:
Թրամփն այցելել էր «Honeywell» ընկերություն՝ ծանոթանալու կորոնավիրուսի դեմ պայքարի համար պարագաների արտադրությանը: Ընկերությունը ձեռք է բերել 27.4 մլն դոլար արժողությամբ պայմանագիր, ըստ որի պարտավորվում է առաջիկա վեց ամսում արտադրել 38 միլիոն պաշտպանիչ դիմակ:
ԱՄՆ-ում հաստատված դեպքերի թիվը կազմում է 1 մլն 237 հազար 761, վարակի հետևանքով մահացել է 72 հազար 275 մարդ:
Ֆրանսիան երկարաձգում է արտակարգ դրության ժամկետը
Ֆրանսիայի Սենատն առաջին ընթերցմամբ հավանության է արժանացրել կորոնավիրուսով պայմանավորված երկրում առկա արտակարգ դրության ժամկետը մինչև հուլիսի 10-ը երկարաձգելու նախագիծը:
«Արմենպրես»-ի հաղորդմամբ, «ՌԻԱ Նովոստի»-ն տեղեկացնում է, որ սենատորները քվեարկել են արտակարգ դրությունը մինչև հուլիսի 10-ը երկարաձգելունախագծի օգտին, թեպետ, ի սկզբանե կառավարությունը նախատեսում էր երկարաձգել մինչև հուլիսի 24-ը: Նախագիծը ենթադրում է հետևել կորոնավիրուսով վարակվածներին և նրանց կոնտակտավորներին: Այս մասին «Թվիթեր»-ում նշել է սենատոր Ֆիլիպ Բան: Նախագծով նախատեսվում է նաև, որ ընտանեկան բռնության զոհ դարձած կանայք պետք է մեկուսացման կամ կարանտինի ռեժիմը պահպանեն ամուսնուց հեռու՝ առանձին պայմաններում: Նախագիծը մայիսի 6-ին կդիտարկի Ֆրանսիայի խորհրդարանի ստորին պալատը:
Ակնկալվում է, որ Ֆրանսիան կսկսի փուլային տարբերակով դուրս գալ կարանտինից մայիսի 11-ին: Վարչապետ Էդուար Ֆիլիպը ներկայացրել էր ինքնամեկուսացումից դուրս գալու նախագիծ՝ հայտարարելով մանկապարտեզների, դպրոցների, խանութների փուլ առ փուլ բացման մասին: Ռեստորաններն ու սրճարաններն առայժմ փակ կմնան: Մայիսի 11-ից պարտադիր կլինի հասարակական տրանսպորտում պաշտպանիչ դիմակ կրելը:
Իրանի 132 քաղաքում կրոնական կառույցները բացվել են
Իրանում Նվիրաբերությունների և բարեգործությունների գծով կազմակերպությունը հայտարարել է, որ կրոնական կառույցները կրկին բացվում են 132 քաղաքում, քանի որ պաշտոնյաները մեղմացնում են սահմանափակումները՝ կապված կորոնավիրուսի տարածման հետ:
«Արմենպրես»-ի հաղորդմամբ, այս մասին տեղեկացնում է «Ռեգնում» գործակալությունը: Նշվում է, որ սահմանափակումների մեղմացում կատարվում է այն քաղաքներում, որտեղ կորոնավիրուսի հետ կապված իրավիճակը բարելավվել է: Իրանում կրոնական կառույցները փակվել են երկու ամիս առաջ, երբ բռնկվեց վարակը:
Նշվում է, որ թեպետ կրոնական կառույցները բացվում են, ամեն դեպքում սահմանվել են որոշ կանոններ այցելուների համար: Անհրաժեշտ է պահպանել սոցիալական հեռավորություն, ինչպես նաև իրենց հետ պետք է բերեն աղոթքի համար նախատեսված բոլոր անհրաժեշտ պարագաները: