ԼՀԿ-ն առաջարկում է Հայաստանում ապրող 500 հազար ընտանիքից յուրաքանչյուրին տրամադրել 100 հազար դրամ
2 րոպեի ընթերցում
ԵՐԵՎԱՆ, 27 ԱՊՐԻԼԻ, ԱՐՄԵՆՊՐԵՍ։ «Լուսավոր Հայաստան» կուսակցությունը պետությանն առաջարկում է Հայաստանում ապրող 500 հազար ընտանիքից յուրաքանչյուրին տրամադրել 100 հազար դրամ։
«Արմենպրես»-ի փոխանցմամբ` այս մասին «Ֆեյսբուք»-ի իր էջի ուղիղ եթերում ասաց կուսակցության ղեկավար Էդմոն Մարուքյանը։
«Միջազգային հանրությունը, տարբեր առաջադեմ երկրներ արդեն գնացել են այս ճանապարհով։ Մենք առաջարկում ենք 100 մլրդ դրամ առանձնացնել մայիս ամսվա համար և այդ գումարից 500 հազար ընտանիքի աջակցություն տրամադրել 100 000-ական դրամի չափով, նաև հավելյալ թոշակ տալ 470 հազար թոշակառուներին»,- ասաց Մարուքյանը։
ԼՀԿ ղեկավարը նշեց, որ աջակցություն պետք չէ տրամադրել պետական սեկտորի և հանրային ծառայությունների բնագավառի աշխատողներին։
ՀՀ կառավարությունը կորոնավիրուսի տնտեսական և սոցիալական հետևանքների չեզոքացման 14 միջոցառում է հաստատել։
Հայաստանի կառավարությունն ապրիլի 14-ին կայացած արտահերթ նիստում ընդունեց hանրապետությունում 2020 թվականի մարտի 16-ին հայտարարված արտակարգ դրության ժամկետը 2020 թվականի ապրիլի 14-ից ժամը 17:00-ից` 30 օրով՝ մինչև 2020 թվականի մայիսի 14-ը ժամը 17:00-ն երկարաձգելու որոշում։ Երկրում գործում է խիստ սահմանափակումների ռեժիմ:
Նորայր Շողիկյան