Օլիմպիական խաղերի ջահը փոխանցումավազքի որոշ հատվածում կաշխատի ջրածնով

ԵՐԵՎԱՆ, 29 ՀՈՒՆՎԱՐԻ, ԱՐՄԵՆՊՐԵՍ: Տոկիոյի Օլիմպիական խաղերի ջահի կրակը փոխանցումավազքի որոշ հատվածներում կվառվի ջրածնով:

«Արմենպրես»-ի հաղորդմամբ` այս մասին հայտնում է խաղերի կազմկոմիտեն: Կազմկոմիտեն ամեն կերպ նպատակ ունի նվազեցնել ածխածնի արտանետումները, որոնք վնասում են կլիմային: Խաղերի կազմակերպիչներն ուզում այս կերպ նաև մասսայական դարձնել Ճապոնիայում էկոլոգիական խնդիրների քննարկումը:

Նույն ջրածնով կաշխատի նաև Օլիմպիական խաղերի ընթացքում վառվելիք հիմնական ջահը:

32-րդ ամառային Օլիմպիական խաղերը կհյուրընկալի Տոկիոն: Այն կմեկնարկի հուլիսի 24-ին և կեզրափակվի օգոստոսի 9-ին: Մոտ 11 հազար մարզիկներ աշխարհի 206 երկրների կմրցեն 33 մարզաձևերում: Տոկիոն երկրորդ անգամ է հյուրընկալելու Օլիմպիական խաղերը. Առաջինը եղել է հեռավոր 1964 թվականին:

Տոկիոյի 32-րդ ամառային Օլիմպիական խաղերի կազմկոմիտեն արդեն իսկ հասցրել է ներկայացնել խաղերի ջահը: Օլիմպիական խաղերի ջահը կշռում է 1,2 կգ և ունի ոսկե սակուրայի տեսք: Ջահը վերևից հիշեցնում է սակուրայի ծաղիկ: 32-րդ ամառային Օլիմպիական խաղերի կրակը կվառվի 2020 թվականի մարտի 11-ին, ըստ ավանդույթի, Հունաստանում: Այն Ճապոնիա կտեղափոխվի 2020 թվականի մարտի 20-ին: Իսկ ջահի փոխանցումավազքը կսկսվի Ֆուկուսիմայում: