ԱԺ հանձնաժողովը 6 ամսում հավանություն է տվել 9 միջազգային պայմանագրի վավերացման
2 րոպեի ընթերցում
![ԱԺ հանձնաժողովը 6 ամսում հավանություն է տվել 9 միջազգային պայմանագրի վավերացման](http://armenpress.am/resized/480/static/news/b/2019/12/1000190.jpg)
ԵՐԵՎԱՆ, 26 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ ազգային ժողովի արտաքին հարաբերությունների մշտական հանձնաժողովը վերջին 6 ամսում դրական եզրակացություն է տվել 9 միջազգային պայմանագրերի վավերացման: «Արմենպրես»-ի հաղորդմամբ՝ այս մասին «Իմ քայլը» խմբակցության ասուլիսում հայտնեց հանձնաժողովի նախագահ Ռուբեն Ռուբինյանը:
«ԱԺ արտաքին հարաբերությունների հանձնաժողովը վերջին 6 ամսվա ընթացքում դրական եզրակացություն է տվել 9 միջազգային պայմանագրի վավերացմանը, այդ թվում՝ Հայաստանի և Չինաստանի միջև վիզային ռեժիմի վերացմանը նվիրված համաձայնագրին և Հայաստանի և Դանիայի միջև վիզային ռեժիմի դյուրացման համաձայնագրին: Հանձնաժողովը նաև որոշում է կայացրել դրական եզրակացություն տալ Հայաստան-Սինգապուր բարեկամական խումբ ստեղծելուն»,-ասաց Ռուբինյանը:
Նա հիշեցրեց՝ նախորդ կիսամյակում Գվատեմալայի հետ միջխորհրդարանական հուշագիր կնքելու գաղափարին հավանության տալն արդեն տվել է իր արդյունքները: Մասնավորապես Գվատեմալայի կոնգրեսի փոխնախագահը Լենա Նազարյանի հրավերով այցելել է Հայաստան, որի շրջանակում այցելել է նաև Արցախ, հանդիպել Արցախի խորհրդարանի նախագահին: «Կարծում եմ, որ սա մեծ շարժ է Կենտրոնական Ամերիկայի երկրների խորհրդարանների հետ մեր հարաբերություններում»,-ասաց Ռուբինյանը: