ՀՀ եւ ՌԴ ԱԳ նախարարները քննարկել են դաշնակցային փոխգործակցության հարցերը
ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: Հայաստանի եւ Ռուսաստանի արտաքին գործերի նախարարներ Զոհրաբ Մնացականյանը եւ Սերգեյ Լավրովը հեռախոսազրույցի ընթացքում քննարկել են դաշնակցային փոխգործակցության հարցերը եւ շփումները Լեռնային Ղարաբաղի հակամարտության կարգավորման շուրջ: Այդ մասին, ինչպես տեղեկացնում Է «Արմենպրես»-ը, ասված Է ՌԴ ԱԳ նախարարության՝ մայիսի 23-ին տարածված հաղորդագրության մեջ:
«Մայիսի 23-ին հայկական կողմի նախաձեռնությամբ կայացել Է Ռուսաստանի Դաշնության արտաքին գործերի նախարար Սերգեյ Լավրովի հեռախոսազրույցը Հայաստանի Հանրապետության արտաքին գործերի նախարար Զոհրաբ Մնացականյանի հետ»,-նշվում Է փաստաթղթում:-Քննարկվել են դաշնակցային փոխգործակցության հրատապ հարցերը, ներառյալ ԱՊՀ-ի կառավարությունների ղեկավարների խորհրդի հունիսի 1-ին Դուշանբեում կայանալիք նիստի եւ Ալմաթիում ՀԱՊԿ-ի արտաքին գործերի նախարարների խորհրդի հունիսի 11-ի նիստի նախապատրաստումը, ինչպես նաեւ ԵԱՏՄ-ի կառույցների գործունեությունը»:
Գերատեսչության հաղորդագրության մեջ նաեւ նշվում Է, որ նախարարները քննարկել են երկկողմ միջոցառումների ժամանակացույցը, ինչպես նաեւ Լեռնային Ղարաբաղի հակամարտության կարգավորման շուրջ ԵԱՀԿ-ի Մինսկի խմբի համանախագահների գծով պլանավորվող շփումները:
Բաժանորդագրվեք մեր ալիքին Telegram-ում