Ադրբեջանի մարդաորսը ոչ մի լավ արդյունքի չի բերի հենց այդ երկրին. Ռուբեն Մելիքյան
ԵՐԵՎԱՆ, 16 ՍԵՊՏԵՄԲԵՐԻ, ԱՐՄԵՆՊՐԵՍ: Արցախի Հանրապետության մարդու իրավունքների պաշտպան Ռուբեն Մելիքյանը հույս ունի, որ Ադրբեջանն այսուհետ որոշակի ողջախոհություն կդրսեւորի եւ չի զբաղվի մարդաորսով, որը ոչ մի լավ արդյունքի չի բերի հենց այդ երկրին: Մեկնաբանելով երեկ Իսրայելցի բլոգեր Ալեքսանդր Լապշինի՝ ադրբեջանական բանտից ազատվելուց հետո սոցցանցի իր էջում կատարած առաջին գրառումը՝ Արցախի ՄԻՊ-ը նշեց, որ Լապշինը ներկայացնում է հիմնականում երկու հետաքրքիր հանգամանք:
«Առաջինը այն, որ հայատյացության մակարդակը ոչ միայն անընդունելի մակարդակի է հասել Ադրբեջանում, այլեւ գնալով ավելի ու ավելի է մեծանում: Իսկ երկրորդը վերաբերում է Ադրբեջանում իսլամական ծայրահեղականության մեծաթիվ ու շատացող կողմնակիցներին, ինչը նույնպես մտահոգիչ է՝ հաշվի առնելով, որ ռադիկալ իսլամիզմը գլոբալ մարտահրավեր է ողջ քաղաքակիրթ հանրության համար»,-«Արմենպրես»-ի հետ զրույցում ասաց Ռուբեն Մելիքյանը:
Նրա խոսքով՝ որոշակի հակազդեցություն միանշանակ նկատելի է, ինչի մասին վկայում են թե իրավապաշտպան համայնքի գործողությունները, թե «Ադրբեջանական լվացքատան» բացահայտումները:
«Մեզ համար կարեւոր է ունենալ որոշակի սկզբունքներին հավատարիմ հարեւան, սակայն ցավոք սրտի, այս ուղղությամբ որեւէ դրական զարգացում չենք տեսնում»,-եզրափակեց Արցախի ՄԻՊ-ը:
Բաժանորդագրվեք մեր ալիքին Telegram-ում