ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ: Ազգային ժողովի ՀՅԴ խմբակցության ղեկավար Արմեն Ռուստամյանը համոզված է, որ Եվրասիական տնտեսական միությանն անդամակցելու ժամանակահատվածում Հայաստանը կարողացել է բազմաթիվ մարտահրավերներ հաղթահարել: Ազգային ժողովում լրագրողների հետ զրույցում Արմեն Ռուստամյանը նշեց, որ ԵԱՏՄ-ին անդամակցելու որոշումն այդ պահին ամենաճիշտն էր: «Եվրասիական տնտեսական միությունում  ունենք տնտեսական հնարավորությունների մեծ դաշտ, որը լիարժեք չի օգտագործվել: Դրանում մենք ենք մեղավոր, քանի որ չենք կարողացել մեր տնտեսությունը համապատասխանեցնել նոր իրավիճակին»,- «Արմենպրես»-ի փոխանցմամբ՝ ընդգծեց նա:

Արմեն Ռուստամյանը  դրական գնահատեց Հայաստանը ԵԱՏՄ կազմից  դուրս բերելու  «Ելք» խմբակցության  նախաձեռնությունն այն առումով, որ դա  լավ հնարավորություն է ևս մեկ անգամ խոսելու ԵԱՏՄ անդամակցության դրական և բացասական կողմերի մասին:

Անդրադառնալով ԵՄ-Հայաստան նոր համաձայնագրին՝  պատգամավորը կարծիք հայտնեց, որ այդ փաստաթուղթը Հայաստանին շատ բան է տալու: Խոսքը, մասնավորապես, այն արժեհամակարգի տեղայնացման մասին է, որն անհրաժեշտ է կառավարման նոր կարգի անցնող երկրին. Արմեն Ռուստամյանի գնահատմամբ՝ եվրոպական պառլամենտարիզմի փորձը, ձեռքբերումներն ու նվաճումները Հայաստանին շատ են պետք: