Միջազգային

Լիտվան որոշել է լուծարել Ռուսաստանի հետ մի քանի երկկողմ համաձայնագրեր

2 րոպեի ընթերցում

Լիտվան որոշել է լուծարել Ռուսաստանի հետ մի քանի երկկողմ համաձայնագրեր

ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ: Լիտվան պլանավորում է լուծարել Ռուսաստանի և Բելառուսի հետ այն երկկողմ համաձայնագրերը, որոնք կարող են փոխարինվել բազմակողմ համաձայնագրերով։ Լիտվայի կառավարությունը մայիսի 22-ին որոշում կկայացնի չորս պայմանագրերի չեղարկման մասին, մնացած առաջարկները դեռ համաձայնեցվում են: «Արմենպրես»-ն այս մասին տեղեկանում է «Ինտերֆաքս» գործակալությունից։

Այսպես, առաջարկվում է լուծարել Ռուսաստանի և Բելառուսի կառավարությունների հետ Լիտվայի համաձայնագրերը ներդրումների խթանման և պաշտպանության, ինչպես նաև առևտրատնտեսական հարաբերությունների վերաբերյալ։

Արդարադատության նախարարությունն առաջարկություն է պատրաստել՝ չեղարկելու Ռուսաստանի հետ քաղաքացիական, ընտանեկան և քրեական գործերով իրավական օգնության ու իրավահարաբերությունների մասին, իսկ ֆինանսների նախարարությունը՝ եկամուտների ու կապիտալի կրկնակի հարկումից խուսափելու և հարկային իրավախախտումների մասին համաձայնագրերը։

Ուկրաինայում Ռուսաստանի ռազմական գործողությունների սկսվելուց հետո «արտաքին գործերի նախարարությունը դիմել է բոլոր հաստատություններին՝ խնդրելով գնահատել Ռուսաստանի հետ միջազգային իրավական համագործակցության մասշտաբն ու անհրաժեշտությունը», - BNS լրատվամիջոցին ասել է Լիտվայի արտգործնախարար Գաբրիելիուս Լանդսբերգիսը։

Առաջարկվում է գնահատել՝ արդյոք կոնկրետ երկկողմ համաձայնագրի գործողությունը կարող է փոխարինվել բազմակողմ համաձայնագրով կամ միջազգային իրավական ակտով։

Լանդսբերգիսի կարծիքով, չնայած այն հանգամանքին, որ երկկողմ համաձայնագրերը կչեղարկվեն, բազմակողմ համաձայնագրերը, որոնք կարող են փոխարինել դրանց, թույլ կտան պահպանել Ռուսաստանի և Բելառուսի հետ շփման պաշտոնական գործիքակազմը։ Նախարարը հավելել է, սակայն, որ երկիրը Ռուսաստանի հետ համագործակցություն չի ակնկալում, «քանի որ այն վաղուց չկա»։

AREMNPRESS

Հայաստան, Երևան, 0002, Մարտիրոս Սարյան 22

+374 11 539818

contact@armenpress.am

fbtelegramyoutubexinstagramtiktokspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2024 ARMENPRESS

Ստեղծվել է՝ MATEMAT-ում