«Հայաստան» հիմնադրամի միջոցներով կհիմնանորոգվի Նալբանդյան գյուղի միջնակարգ դպրոցը

ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ: «Հայաստան» համահայկական հիմնադրամի Տորոնտոյի տեղական մարմնի բարերարներ տեր և տիկին Արմէն և Պերճուհի Նալպանտեանները ստանձնել են Արմավիրի մարզի Նալբանդյան գյուղի միջնակարգ դպրոցի հիմնանորոգման հովանավորչությունը: Ինչպես «Արմենպրես»-ին տեղեկացրին «Հայաստան» համահայկական հիմնադրամից, 1967թ.-ին կառուցված եռահարկ դպրոցի երեք մասնաշենքերի և կից մարզադահլիճի (ընդհանուր` շուրջ 3200 քմ) հիմնանորոգումը նախատեսում է վերահատակագծում` ներառյալ նոր աստիճանավանդակի տեղադրում, սանհայգույցների իրականացում բոլոր հարկերում, ծածկի, հիմնական պատերի ուժեղացում, ինժեներական ներքին ցանցի թարմացում, հատակների վերակառուցում գրանիտով եւ մանրատախտակով, ներքին հարդարում, հարակից տարածքի մասնակի բարեկարգում:

Վերջին տարիներին կատարվել են դպրոցի բարեկարգմանն ուղղված մասնակի աշխատանքներ` ջեռուցման համակարգի, դռների, լուսամուտների փոխարինում:

«Տորոնտահայ համայնքը` հավատարիմ իր սկզբունքներին, շարունակում է ծրագրերը դպրոցաշինության ոլորտում»,- նշել է Հիմնադրամի Տորոնտոյի տեղական մարմնի ատենապետ Մկրտիչ Մկրտչյանը:

Նալբանդյան գյուղի միջնակարգ դպրոցում սովորում է շուրջ 600 աշակերտ: