ԵՐԵՎԱՆ, 18 ՄԱՅԻՍԻ, ԱՐՄԵՆՊՐԵՍ: Ամստերդամի հոլանդական «Ազգային բալետ»-ի երկրորդ հայ մենապարուհի Վիկտորյա Անանյանը կանցկացնի բալետի բացառիկ պարապմունք հայ մանուկների եւ պատանիների համար: Դասընթացը կանցկացվի մայիսի 25-ին Հաագայում` 4-20 տարեկան երեխաների և պատանիների համար: Ինչպես «Արմենպրես»-ին տեղեկացրին դասընթացի կազմակերպիչ «Աբովյան» մշակութային միությունից, պարապմունքը բաց կլինի բոլորի համար: Արժեքը` 20 եվրո մեկ մասնակցի համար, 30 եվրո` նույն ընտանիքի երկու մասնակցի համար

Վիկտորյա Անանյանն Ամստերդամի հոլանդական «Ազգային բալետ»-ի երկրորդ մենապարուհին է: Նա ծնվել է Երևանում: 2003-ին Վիկտորյան ավարտել է Պերմի պարարվեստի պետական ուսումնարանը: Ուսումն ավարտելուց հետո չորս տարի եղել է Պերմի Չայկովսկու անվան օպերայի և բալետի պետական ակադեմիական թատրոնի մենապարուհի, իսկ 2007 թվականից նա պարում է Ամստերդամի «Ազգային բալետի» կազմում, որտեղ 2010 թվականին նրան շնորհվեց երկրորդ մենապարուհի կոչումը: 2011-2012 համերգային սեզոնում Վիկտորյան եղել է Սան Ֆրանցիսկոյի բալետային խմբի մենապարուհի: