ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Ռուսաստանը և Ամերիկայի Միացյալ Նահանգները հերթական անգամ հաստատել են Լեռնային Ղարաբաղի հակամարտության խաղաղ կարգավորման շուրջ իրենց դիրքորոշումը: Ինչպես հաղորդում է «Արմենպրես»-ը` վկայակոչելով ՌԴ ԱԳՆ պաշտոնական կայքը, Ռուսաստանի արտաքին գործերի նախարար Սերգեյ Լավրովը եւ ԱՄՆ պետքարտուղար Հիլարի Քլինթոնը Վլադիվոստոկում լրագրողի հետ զրույցում անդրադարձել են իրենց հանդիպման մանրամասներին: «Որպես ԵԱՀԿ Մինսկի խմբի համանախագահ երկրներ` մենք ջանք չենք խնայելու Լեռնային Ղարաբաղի հակամարտության կարգավորման գործում բանակցությունների վերսկսման համար»,- նշել է Ռուսաստանի ԱԳ նախարարը:

Երկու պետությունների արտաքին գործատեսչության ղեկավարների հանդիպումը կայացել է Ասիական-խաղաղօվկիանոսյան տնտեսական համագործակցության գագաթնաժողովի շրջանակներում, որն այս անգամ հյուրընկալել է Ռուսաստանը: Լավրովի եւ Քլինթոնի հանդիպմանը երկկողմ օրակարգից զատ անդրադարձ է եղել նաեւ իրանական միջուկային ծրագրի հարցին, Սիրիայի եւ Կորեական թերակղզու իրավիճակին: