Իրանի դեմ թշնամանքը ԱՄՆ քաղաքականության անփոփոխ մասն է. Իրանի ԱԳՆ խոսնակ

ԵՐԵՎԱՆ, 21 ՄԱՐՏԻ, ԱՐՄԵՆՊՐԵՍ: Իրանի և նրա ժողովրդի նկատմամբ թշնամանքն ԱՄՆ վարչակազմի արտաքին քաղաքականության անբաժանելի բաղադրիչ մասն է: «Արմենպրես»-ի փոխանցմամբ՝ նման հայտարարություն է արել Իսլամական Հանրապետության արտաքին գործերի նախարարության պաշտոնական ներկայացուցիչ Նասեր Քանաանին՝ մեկնաբանելով մարտի 21-ին նշվող Նոուրուզի (իրանական տարեցույցով Նոր տարի) տոնի առթիվ ԱՄՆ նախագահ Ջո Բայդենի հայտարարությունը։

«Իրանի Իսլամական Հանրապետության և իրանցի ժողովրդի դեմ թշնամանքն ԱՄՆ վարչակազմի արտաքին քաղաքականության անփոփոխ ​​բաղադրիչն է, ինչն ամեն տարի դրսևորվում է Նոուրուզի առթիվ նրա պաշտոնատար անձանց հայտարարություններում: Իրանցի կանանց աջակցելու մասին կեղծ պնդումները, որոնք միևնույն ժամանակ ուղեկցվում են Իրանի ժողովրդի դեմ խիստ պատժամիջոցների պահպանմամբ և խստացմամբ, ցույց են տալիս ամերիկյան վարչակարգի և նրա հակաիրանական ղեկավարների երեսպաշտությունն ու թշնամանքը», - գրել է Քանաանին Twitter -ում:

دشمنی با نظام جمهوری اسلامی و ملت ایران، بخش ثابت سیاست خارجی رژیم آمریکاست که در پیام #نوروز هر ساله مقامات آن نیز خود را نشان میدهد.

ادعای دروغین حمایت از زنان ایرانی و همزمان حفظ و تشدید تحریمهای ظالمانه علیه ملت #ایران، نمایش نفاق و دشمنی رژیم #آمریکا و رهبران ضدایرانی آنست.

— Nasser Kanaani (@IRIMFA_SPOX) March 21, 2023

Նոուրուզի առթիվ հայտարարության մեջ Բայդենը նշել էր, որ տոնը «զուգադիպում Է հանուն իրենց իրավունքների և հիմնարար ազատությունների պայքարող իրանցի կանանց համար դժվարին ժամանակների հետ», և որ «ԱՄՆ-ը կշարունակի հանդես գալ նրանց և Իրանի բոլոր քաղաքացիների կողմից»: