Մեծ Բրիտանիան նոր ԱԳ նախարար ունի. Ջոնսոնը փոփոխություններ է արել կառավարության կազմում

ԵՐԵՎԱՆ, 15 ՍԵՊՏԵՄԲԵՐԻ, ԱՐՄԵՆՊՐԵՍ: Մեծ Բրիտանիայի արտաքին գործերի նախարարի պաշտոնը 2019 թվականից ի վեր զբաղեցնող Դոմինիկ Ռաաբը վարչապետ Բորիս Ջոնսոնի թարմացված կաբինետում ստացել է արդարադատության նախարարի պաշտոնը: «Արմենպրես»-ի փոխանցմամբ, այս մասին հայտնել է BBC-ի քաղաքական մեկնաբան Լորա Կյունսբերգը:

Ռաաբը ընդդիմության կողմից խիստ քննադատության էր սկսել ենթարկվել այն բանի համար, որ Քաբուլի վրա թալիբների հարձակման և Աֆղանստանից բրիտանացիների տարհանման մեկնարկի ժամանակ արձակուրդի մեջ էր Հունաստանում և հրաժարվել էր հետ վերադառնալ երկիր:

Փոխարենը, արտգործնախարարի պաշտոնին է նշանակվել Էլիզաբեթ Տրասը, ում զբաղեցրած արտաքին առևտրի նախարարի պաշտոնը այս պահին թափուր է: Նա շարունակելու է զբաղեցնել նաև կանանց և իրավահավասարության հարցերով նախարարի պաշտոնը: