3 წუთი კითხვის
სომხეთი და საქართველო ეუთოს მხარდაჭერით თანამშრომლობენ ტრანსსასაზღვრო ტყის ხანძრების რისკების შეფასებისა და მათი პრევენციის მიმართულებით.
„არმენპრესის“ ცნობით, ამის შესახებ COP17-ის ფარგლებში გამართულ ღონისძიებაზე, „ეკოსისტემების განმტკიცება, მომავლის გარანტირება: ტრანსსასაზღვრო თანამშრომლობა სომხეთსა და საქართველოს შორის“, სომხეთის რესპუბლიკის საგარეო საქმეთა მინისტრის მოადგილე რობერტ აბისოღომონიანმა განაცხადა.
მისი თქმით, სომხეთი და საქართველო მეგობარი და მოძმე ქვეყნები არიან, რომელთაც კომუნიკაციების, მდგრადი განვითარებისა და გარემოს დაცვის სფეროებში თანამშრომლობის ხანგრძლივი ისტორია აკავშირებთ.
„ტყის ხანძრები მკაფიო მაგალითია ისეთი გამოწვევისა, რომელიც სახელმწიფო საზღვრებს არ ცნობს. ასეთ რისკებთან გამკლავება მოითხოვს ინფორმაციის გაცვლას, მზადყოფნის კოორდინაციასა და საზღვრის ორივე მხარეს მოქმედი შესაბამისი სტრუქტურების ძალისხმევის გაერთიანებას. სწორედ ამას ახორციელებენ სომხეთი და საქართველო ეუთოს მხარდაჭერით“, - აღნიშნა აბისოღომონიანმა.
მისი განცხადებით, სომხეთსა და საქართველოს შორის გარემოსდაცვით სფეროში თანამშრომლობა ორმხრივი ურთიერთობების მნიშვნელოვანი კომპონენტია და მისი არსი არა მხოლოდ კონკრეტული რისკების აღმოფხვრაში, არამედ საერთო პრიორიტეტების გარშემო ინსტიტუტების, ექსპერტებისა და თემების კონსოლიდაციაშიც მდგომარეობს.
„ეს ჩვენი სტრატეგიული პარტნიორობის მნიშვნელოვანი მხარეა. ის აჩვენებს, თუ როგორ შეუძლია ორმხრივ ურთიერთობებს ხელშესახები სარგებელი მოუტანოს ხალხს, განსაკუთრებით კი სასაზღვრო რეგიონებში მცხოვრებლებს, რომელთა საარსებო გარემო და კეთილდღეობა ბუნებრივი რესურსების მდგრად მართვაზეა დამოკიდებული“, - აღნიშნა მან და დასძინა, რომ ბიომრავალფეროვნების შესახებ ერთიანი გლობალური ჩარჩოს განხორციელება მოითხოვს ისეთ მიდგომებს, რომლებიც ითვალისწინებს თითოეული რეგიონის გარემოსდაცვით და გეოგრაფიულ თავისებურებებს.
საქართველოს გარემოს დაცვისა და სოფლის მეურნეობის სამინისტროს სატყეო პოლიტიკის დეპარტამენტის უფროსმა კარლო ამირგულაშვილმა ტყის ხანძრები შეაფასა როგორც სერიოზული გამოწვევა საქართველოსა და მთელი რეგიონისთვის.
„ჩვენ ყველანი მოწოდებულნი ვართ გადავდგათ აუცილებელი ნაბიჯები, რათა წინ აღვუდგეთ მათ გამომწვევ მიზეზებსა და შედეგებს“, - განაცხადა მან და ხაზგასმით აღნიშნა, რომ მიმდინარე ღონისძიებები არა მხოლოდ ტყის ხანძრების მართვას უწყობს ხელს, არამედ შესაძლებლობას იძლევა, განმტკიცდეს თანამშრომლობა სომხეთსა და საქართველოს შორის.