სომხეთისა და თურქეთის მარეგულირებელი ორგანოების წარმომადგენლებმა მაუწყებლობის სფეროში არსებული ტენდენციები და თანამედროვე გამოწვევები განიხილეს

სოფიაში სომხეთის ტელევიზიისა და რადიოს კომისიის თავმჯდომარეს, ტიგრან ჰაკობიანსა და თურქეთის რადიოსა და ტელევიზიის უმაღლესი საბჭოს (Radyo ve Televizyon Üst Kurulu) თავმჯდომარის მოადგილეს, დენიზ გიულერს შორის შეხვედრა გაიმართა.

„არმენპრესის“ ცნობით, სომხეთის ტელევიზიისა და რადიოს კომისიაში აცხადებენ, რომ შეხვედრისას მხარეებმა მაუწყებლობის სფეროში არსებული ტენდენციები, თანამედროვე გამოწვევები და მარეგულირებელი ორგანოების საქმიანობასთან დაკავშირებული მთელი რიგი საკითხები განიხილეს.

ყურადღება გამახვილდა სომხეთისა და თურქეთის მარეგულირებელ უწყებებს შორის თანამშრომლობის შემდგომი განვითარებისა და გაფართოების შესაძლებლობებზე, მათ შორის გამოცდილებისა და პროფესიული ცოდნის გაზიარებაზე, დარგობრივი დიალოგის გააქტიურებასა და ორმხრივი ინტერესის სფეროში შემავალი ინიციატივების ფარგლებში პარტნიორობაზე. ამასთან, ხაზი გაესვა საერთაშორისო და რეგიონულ პლატფორმებზე თანამშრომლობის გაღრმავების მნიშვნელობას.

მხარეებმა ხაზგასმით აღნიშნეს მსგავსი შეხვედრების სისტემატური ხასიათის აუცილებლობა და განაცხადეს, რომ დიალოგი საკვანძო მნიშვნელობისაა მაუწყებლობის სფეროს ეფექტიანი რეგულირებისა და ახალ გამოწვევებზე ერთობლივი რეაგირების თვალსაზრისით.

შეხვედრაზე ასევე განიხილეს ურთიერთგაგების მემორანდუმის შესაძლო ხელმოწერის საკითხი, რომლის პროექტიც უკვე შემუშავების პროცესშია.