სომხეთის პრემიერ-მინისტრს ტურიზმის განვითარების ყველაზე მნიშვნელოვან ფაქტორად მშვიდობა მიაჩნია
2 წუთი კითხვის
სომხეთის პრემიერ-მინისტრი ნიკოლ ფაშინიანი ტურიზმის სტიმულირებისთვის ყველაზე მნიშვნელოვან ფაქტორად ახლად დამყარებულ მშვიდობას მიიჩნევს. „არმენპრესის“ ცნობით, ამის შესახებ ფაშინიანმა ნიუ-იორკში „კონკორდიას“ ყოველწლიური სამიტის პანელურ დისკუსიაზე განაცხადა.
„იყო ძალიან საინტერესო ნიუანსი: როდესაც სამშვიდობო პროცესები აქტიურდებოდა, იმ პერიოდში ტურისტების ნაკადი იზრდებოდა; ამას ვხედავთ ახლაც. ტურიზმი ყველაზე მგრძნობიარე სფეროა უსაფრთხოების პრობლემების მიმართ, როდესაც არის მშვიდობა და სტაბილურობა, ტურიზმისთვის გრავიტაციული ველი ყალიბდება და ახლა სომხეთი, მართლაც, სულ უფრო მიმზიდველი ხდება ტურიზმისთვის. მშვიდობა კარგ შესაძლებლობას იძლევა, რომ სხვადასხვა ქვეყნიდან ადამიანები ჩამოვიდნენ, ნახონ ისტორიული ადგილები, სიწმინდეები, მშვენიერი ბუნება, სომხური შესანიშნავი სამზარეულო და კეთილი, კარგი ადამიანები. სხვათა შორის, როდესაც ტურისტებს ვეკითხები, თუ რა არის ყველაზე მიმზიდველი ფაქტორი, ამბობენ, რომ ეს სომხური სტუმართმოყვარეობა და ადამიანების სითბოა. მე მიმაჩნია, რომ ეს კარგი ბრენდინგია ჩვენი ქვეყნისთვის“, - აღნიშნა პრემიერ-მინისტრმა.
სომხეთის რესპუბლიკის პრემიერ-მინისტრი ნიკოლ ფაშინიანი 22-25 სექტემბერს სამუშაო ვიზიტით ამერიკის შეერთებულ შტატებში იმყოფება.