3 წუთი კითხვის
ევროკავშირი კანადას კარებს უღებს და სთავაზობს გახდეს პირველი ასოცირებული წევრი - სტატუსი, რომელიც გაერთიანების ხელშეკრულებებში არ არსებობს. „არმენპრესის“ ცნობით, France 24-ზე დაყრდნობით, ამის შესახებ საფრანგეთის ქალაქ სტრასბურგში, ევროკავშირის მდგომარეობის შესახებ ყოველწლიური სიტყვით გამოსვლისას, ევროკომისიის პრეზიდენტმა ურსულა ფონ დერ ლაიენმა განაცხადა.
„მსურს თქვენთან ერთად ვიმუშაო იმ მიმართულებით, რომ კანადას გავუხსნათ კარი ევროკავშირის პირველი ასოცირებული წევრი გახდომისთვის“, - განაცხადა ფონ დერ ლაიენმა კანადის პრემიერ-მინისტრ მარკ კარნისადმი მიმართვისას, რომელიც სიტყვით გამოსვლას სპეციალური სტუმრის სტატუსით ესწრებოდა.
„პარტნიორობა ევროპისთვის სტრატეგიული არჩევანია. თუმცა, ეს ასევე არის პასუხი საერთაშორისო, წესებზე დაფუძნებულ სისტემაში არსებულ ბზარებზე“, - აღნიშნა ლაიენმა.
„ჩვენ მსოფლიოს ერთნაირი თვალით ვუყურებთ - ხელოვნური ინტელექტიდან კლიმატის ცვლილებამდე, არქტიკიდან გეოპოლიტიკამდე. ჩვენ ერთიანი ვიყავით როგორც უკრაინის, ისე თავდაცვის, ნედლეულისა და მიწოდების ჯაჭვების საკითხებში. მაგრამ რაც ყველაზე მნიშვნელოვანია... ევროპასა და კანადას სჯერათ დემოკრატიის“, - დასძინა მან.
ფონ დერ ლაიენმა განაცხადა, რომ კანადა და ევროკავშირი განავითარებენ მოქმედ თავისუფალი ვაჭრობის შეთანხმებას და შექმნიან უფრო ყოვლისმომცველ „ალიანსს მომავლისთვის“, რომლის მიზანიც „საერთო კეთილდღეობისა და ეკონომიკური უსაფრთხოების სივრცის“ ჩამოყალიბებაა.
ლაიენის თქმით, ეს არის პარტნიორობა არა ვინმეს წინააღმდეგ, არამედ საერთო ძალისთვის.
„მოკლედ რომ ვთქვათ, ჩვენ გვსურს კანადასთან ურთიერთობები შესაძლო უმაღლეს დონემდე ავიყვანოთ“, - განაცხადა მან.
კანადის პრემიერ-მინისტრი მარკ კარნი ევროპარლამენტში სიტყვით 17 სექტემბერს გამოვა.
აშშ-ის პრეზიდენტ დონალდ ტრამპის მიერ დაწესებულმა საბაჟო გადასახადებმა და კანადის აშშ-ის 51-ე შტატად ქცევის შესახებ პერიოდულად გაჟღერებულმა განცხადებებმა კანადას უბიძგა ევროპასთან ეკონომიკური და უსაფრთხოების კავშირების გაღრმავებისკენ. კარნიმ მოუწოდა ევროკავშირთან „უნიკალური ალიანსის“ დამყარებისკენ, რათა შემცირდეს აშშ-სთან ვაჭრობაზე მისი დიდი დამოკიდებულება.