სომხეთმა ევრაზიული ეკონომიკური კავშირის ფარგლებში სომხურ პროდუქციაზე რუსეთის მიერ დაწესებული შეზღუდვები გაასაჩივრა
2 წუთი კითხვის
სომხეთმა ევრაზიული ეკონომიკური კავშირის ფარგლებში სომხურ პროდუქციაზე რუსეთის მიერ დაწესებული შეზღუდვები გაასაჩივრა და მოელის, რომ არსებული მექანიზმების ამოქმედებით დაბრკოლებები აღმოიფხვრება. „არმენპრესის“ ცნობით, ამის შესახებ ბრიფინგზე სომხეთის ეკონომიკის მინისტრის მოადგილემ, ტიგრან გასპარიანმა განაცხადა.
რუსულ მხარესთან კომუნიკაციასა და შეზღუდვების წარმოდგენილ დასაბუთებებზე საუბრისას, გასპარიანმა ხაზი გაუსვა, რომ საკითხი ევრაზიული ეკონომიკური კავშირის ფორმატშიც განიხილება.
„აქ მნიშვნელოვანია არა მხოლოდ რუსეთთან ჩვენი კონტაქტები, არამედ ჩვენი შესაძლებლობები ევრაზიული ეკონომიკური კავშირის ფარგლებში, ვინაიდან არსებობს კონკრეტული მექანიზმები, რომელთა გამოყენებაც შესაძლებელია მსგავსი დაბრკოლებების მოსახსნელად. ჩვენ აქტიურად ვიყენებთ ამ შესაძლებლობებს. გავასაჩივრეთ და გვაქვს იმედი და დარწმუნებულობა, რომ მექანიზმებმა უნდა იმუშაოს, რათა დაბრკოლებები მოიხსნას“, - განაცხადა მინისტრის მოადგილემ.
ჟურნალისტის დაზუსტებით შეკითხვაზე, არის თუ არა უსაფუძვლო რუსული მხარის მტკიცებები სომხური პროდუქციის ხარისხთან დაკავშირებით, გასპარიანმა უპასუხა, რომ სომხური მხარის შეფასებით, დაწესებული დაბრკოლებები არ შეესაბამება ევრაზიულ ეკონომიკურ კავშირში მიღწეულ შეთანხმებებსა და პრინციპებს.
„ჩვენი აზრით, დაბრკოლებები არ შეესაბამება ევრაზიული ეკონომიკური კავშირის ფარგლებში მიღწეულ შეთანხმებებსა და პრინციპებს. ამიტომაც ვიბრძვით, რათა ევრაზიულმა ეკონომიკურმა კავშირმა საკუთარი პრინციპების შესაბამისად იმოქმედოს“, - აღნიშნა მან.
გასპარიანმა ხაზგასმით აღნიშნა, რომ სომხეთი ევრაზიული ეკონომიკური კავშირის ინსტრუმენტარიუმს დარღვეული პრინციპების აღსადგენად იყენებს.