2 წუთი კითხვის
სომხეთის პრეზიდენტის, ვაჰაგნ ხაჩატურიანის ბრძანებულებით ნიკოლ ფაშინიანი სომხეთის რესპუბლიკის პრემიერ-მინისტრის პოსტზე დაინიშნა.
„არმენპრესის“ ცნობით, შესაბამისი ბრძანებულება სომხეთის პრეზიდენტის ოფიციალურ ვებგვერდზე გამოქვეყნდა.
„კონსტიტუციის 149-ე მუხლის 1-ელი ნაწილის საფუძველზე, ნიკოლ ფაშინიანი დაინიშნოს პრემიერ-მინისტრად“, — ნათქვამია ბრძანებულებაში.
შეგახსენებთ, რომ 2 აგვისტოს დაიწყო სომხეთში 7 ივნისს ჩატარებული საპარლამენტო არჩევნების შედეგად ჩამოყალიბებული პარლამენტის პირველი სესია. სომხეთის კონსტიტუციის თანახმად, ახლადმარჩეული პარლამენტის პირველი სხდომის დღეს სომხეთის მთავრობამ გადადგომის შესახებ განცხადება უნდა წარადგინოს. 2 აგვისტოს პრემიერ-მინისტრმა ნიკოლ ფაშინიანმა ხელი მოაწერა მთავრობის გადადგომის შესახებ სომხეთის პრეზიდენტისადმი მიმართულ განცხადებას, რომელიც შემდგომ პრეზიდენტის ადმინისტრაციაში გაიგზავნა. პრეზიდენტმა ვაჰაგნ ხაჩატურიანმა მთავრობის გადადგომა დაამტკიცა. ამის შემდეგ სომხეთის პრეზიდენტს, კონსტიტუციის 149-ე მუხლის 1-ელი ნაწილის თანახმად, პრემიერ-მინისტრის პოსტზე პარლამენტში უმრავლესობის მოპოვებული პოლიტიკური ძალის მიერ წარდგენილი კანდიდატი უნდა დაენიშნა. პარლამენტში უმრავლესობის მქონე პარტია „სამოქალაქო შეთანხმებამ“ პრემიერ-მინისტრის პოსტზე ნიკოლ ფაშინიანის კანდიდატურა წარადგინა.