სომხეთ-თურქეთის ურთიერთობების ნორმალიზების პროცესში ახალი სპეციალური წარმომადგენლის კანდიდატურის საკითხი განხილვის ეტაპზეა - სომხეთის პრემიერ-მინისტრი

სომხეთის რესპუბლიკის პრემიერ-მინისტრმა ნიკოლ ფაშინიანმა განაცხადა, რომ სომხეთ-თურქეთის ურთიერთობების ნორმალიზების პროცესში სომხური მხარის ახალი სპეციალური წარმომადგენლის კანდიდატურის საკითხი განხილვის ეტაპზეა.

ამის შესახებ ნიკოლ ფაშინიანმა მთავრობის სხდომის შემდეგ გამართულ ბრიფინგზე „არმენპრესის“ კორესპონდენტის კითხვის საპასუხოდ აღნიშნა.

„სპეციალურ წარმომადგენელთან დაკავშირებით გადაწყვეტილება ჯერ მიღებული არ არის. თურქეთთან კომუნიკაციის ფორმატში ჩვენ უნდა განვსაზღვროთ, თუ როგორ გავაგრძელებთ მუშაობას, რა ლოგიკითა და ფორმატით, რათა შესაბამისი გადაწყვეტილებები მივიღოთ. ამ თემაზე ახლა კონსულტაციები მიმდინარეობს“, - განაცხადა ფაშინიანმა.

სომხეთ-თურქეთის ურთიერთობების ნორმალიზების პროცესში სომხური მხარის ყოფილი სპეციალური წარმომადგენელი რუბენ რუბინიანი პარტია „სამოქალაქო შეთანხმების“ მიერ მე-9 მოწვევის ეროვნული ასამბლეის თავმჯდომარის კანდიდატად არის წარდგენილი.