ევროკავშირი სომხეთიდან ექსპორტირებული არაერთი დასახელების საქონლის უბაჟოდ მიღებას გეგმავს - ფაშინიანი
2 წუთი კითხვის
ევროკომისიამ მიიღო გადაწყვეტილება სომხეთიდან ექსპორტირებული გარკვეული პროდუქციის მიმართ ავტონომიური სავაჭრო ღონისძიებები გაატაროს, რაც ამ საქონლის ნაწილის ევროკავშირში საბაჟო გადასახადის გარეშე გატანის შესაძლებლობას შექმნის.
„არმენპრესის“ ცნობით, ამის შესახებ მთავრობის სხდომაზე სომხეთის პრემიერ-მინისტრმა ნიკოლ ფაშინიანმა განაცხადა.
მისი თქმით, აღნიშნული ინიციატივა სომხეთიდან პოტენციური ექსპორტის დაახლოებით 80%-ს შეეხება.
„უვიზო საექსპორტო რეჟიმი გავრცელდება სასოფლო-სამეურნეო დანიშნულების პროდუქციის თითქმის 99%-ზე, ასევე ალკოჰოლური და უალკოჰოლო სასმელების დაახლოებით 90%-ზე. საქონლის საბოლოო ნუსხა კიდევ დაზუსტდება“, - აღნიშნა პრემიერმა.
პრემიერ-მინისტრმა ხაზგასმით აღნიშნა, რომ ევროკავშირის წევრმა სახელმწიფოებმა უნდა დაამტკიცონ ეს გადაწყვეტილება, ხოლო ევროპარლამენტმა შესაბამისი რეზოლუცია უნდა მიიღოს, რასაც გარკვეული დრო დასჭირდება.
„პოლიტიკურ დონეზე საკითხი, არსებითად, გადაწყვეტილია. ახლა საჭიროა კერძო სექტორთან მუშაობა, რათა პრაქტიკულ დონეზეც სრულად შევძლოთ შექმნილი შესაძლებლობების ათვისება“, - დასძინა ფაშინიანმა.
შეგახსენებთ, რომ 2 ივლისს სომხეთს სამუშაო ვიზიტით ევროკომისიის პრეზიდენტი ურსულა ფონ დერ ლაიენი ეწვია. ვიზიტის ფარგლებში ევროკომისიის პრეზიდენტი სომხეთის პრემიერ-მინისტრ ნიკოლ ფაშინიანს შეხვდა.