ფაშინიანი გამორიცხავს ევროკავშირთან დაახლოების პროცესის ერთ ღამეში შეწყვეტის სცენარის განმეორებას

სომხეთის პრემიერ-მინისტრმა ნიკოლ ფაშინიანმა უპასუხა კითხვას - „გამორიცხავს თუ არა 2013 წლის იმ სიტუაციის განმეორებას, როდესაც სომხეთმა, რუსეთის მხრიდან ზეწოლის გამო, ერთ ღამეში გადაწყვიტა ევროკავშირთან დაახლოების პროცესის შეწყვეტა“.

„არმენპრესის“ ცნობით, პრემიერ-მინისტრმა ამ თემას ევროკომისიის პრეზიდენტ ურსულა ფონ დერ ლაიენთან ერთად გამართულ ერთობლივ პრესკონფერენციაზე, ჟურნალისტის შესაბამისი კითხვის საპასუხოდ შეეხო.

შეგახსენებთ, რომ 2013 წლის სექტემბერში, სომხეთის მაშინდელმა პრეზიდენტმა სერჟ სარგსიანმა, მოსკოვში რუსეთის პრეზიდენტ ვლადიმერ პუტინთან შეხვედრის შემდეგ განაცხადა, რომ სომხეთი აპირებს გაწევრიანდეს საბაჟო კავშირში, რომელიც მოგვიანებით ევრაზიულ ეკონომიკურ კავშირად გარდაიქმნა. ეს მოხდა იმ ფონზე, როდესაც სომხეთს უკვე დასრულებული ჰქონდა მოლაპარაკებები ევროკავშირთან ასოცირების შეთანხმებაზე და მხარეებს ხელი მასზე 2013 წლის ნოემბერში, ვილნიუსის „აღმოსავლეთ პარტნიორობის“ სამიტზე უნდა მოეწერათ. აღნიშნული განცხადების შემდეგ ასოცირების შეთანხმებას ხელი აღარ მოეწერა, თუმცა შემდგომში სომხეთსა და ევროკავშირს შორის გაფორმდა კომპლექსური და გაფართოებული პარტნიორობის შეთანხმება.

„ჯერ იმ თემას შევეხები, გამოვრიცხავ თუ არა 2013 წლის იმ სიტუაციას, როდესაც სომხეთმა ერთ ან ორ ღამეში უარი თქვა ევროკავშირთან ასოცირების შეთანხმების ხელმოწერის უკვე შეთანხმებულ პროცესზე და მიიღო გადაწყვეტილება ევრაზიული ეკონომიკური კავშირის ან საბაჟო კავშირის მიმართულებით წასვლის შესახებ. კითხვას მოკლედ და კონკრეტულად ვუპასუხებ: დიახ, გამოვრიცხავ, ეს შეუძლებელია. მით უმეტეს ახლა, როდესაც სომხეთის რესპუბლიკის მოსახლეობამ მკაფიო მხარდაჭერა გამოუცხადა იმ პოლიტიკას, რომელსაც ქვეყანა აწარმოებს, კერძოდ - საგარეო პოლიტიკის ბალანსირებას. ამავდროულად, როგორც უკვე განვაცხადეთ, ჩვენ არასდროს დაგვისვამს მიზნად, არ გვაქვს და არც დავისახავთ მიზნად სომხეთსა და რუსეთს შორის ურთიერთობებში კრიზისის შექმნას. ჩვენ ვმოქმედებთ ჩვენი ქვეყნის ინტერესებიდან გამომდინარე. ბუნებრივია, არცერთი საერთაშორისო პარტნიორის ინტერესებს არ უგულებელვყოფთ, მაგრამ, მეორე მხრივ, ვერცერთი სხვა პარტნიორის ინტერესებს ვერ დავაყენებთ სომხეთის რესპუბლიკის ინტერესებზე მაღლა, და ვფიქრობ, ეს ნებისმიერი ქვეყნისთვის ლოგიკურია“, - განაცხადა პრემიერ-მინისტრმა.

ნიკოლ ფაშინიანი ასევე შეეხო 1 ივლისს რუსეთის პრემიერ-მინისტრ მიხაილ მიშუსტინთან გამართულ სატელეფონო საუბარს.

ჟურნალისტის კითხვაზე, თუ რა საკითხები განიხილეს რუსეთის პრემიერ-მინისტრთან სატელეფონო საუბრისას, ნიკოლ ფაშინიანმა უპასუხა:

„განსახილველ საკითხთა წრე ოფიციალურ განცხადებაში იყო წარმოდგენილი. ჩვენ შევთანხმდით, რომ უახლოეს მომავალში უფრო დეტალური დისკუსიები გვექნება“.

სომხეთის პრემიერ-მინისტრის აპარატმა 1 ივლისს გაავრცელა ინფორმაცია ნიკოლ ფაშინიანისა და მიხაილ მიშუსტინის სატელეფონო საუბრის შესახებ. განცხადებაში აღნიშნული იყო, რომ მხარეებმა განიხილეს სომხეთ-რუსეთის თანამშრომლობის დღის წესრიგის აქტუალური საკითხები სავაჭრო-ეკონომიკურ, სამეცნიერო-ტექნიკურ და კულტურულ-ჰუმანიტარულ სფეროებში.