სომხეთის საგარეო საქმეთა მინისტრის მოადგილე პარიზში იუნესკოს გენერალური დირექტორის მოადგილეს შეხვდა

სომხეთის რესპუბლიკის საგარეო საქმეთა მინისტრის მოადგილე რობერტ აბისოღომონიანი პარიზში იუნესკოს გენერალური დირექტორის მოადგილეს საბუნებისმეტყველო მეცნიერებების საკითხებში, ლიდია ბრიტოს შეხვდა.

„არმენპრესის“ ცნობით, რომელსაც იგი სომხეთის საგარეო საქმეთა სამინისტროს მიერ გავრცელებულ განცხადებაზე დაყრდნობით ავრცელებს, შეხვედრის მსვლელობისას ყურადღება გამახვილდა 2026 წელს სომხეთში გასამართი ბიომრავალფეროვნების შესახებ კონვენციის მხარეთა მე-17 კონფერენციის მოსამზადებელ სამუშაოებსა და კონფერენციის ფარგლებში დაგეგმილ ინიციატივებზე.

საგარეო საქმეთა მინისტრის მოადგილემ ხაზი გაუსვა კონფერენციის ფარგლებში გასამართ ლიდერთა სამიტსა და მაღალი დონის მინისტრთა სეგმენტში უმაღლესი დონის ჩართულობის უზრუნველყოფის მნიშვნელობას.

საგარეო საქმეთა მინისტრის მოადგილემ ხაზგასმით აღნიშნა იუნესკოს წამყვანი როლი გლობალური გარემოსდაცვითი გამოწვევების, მათ შორის ბიომრავალფეროვნების შენარჩუნებისკენ მიმართულ ძალისხმევაში. ამ კონტექსტში მხარეებმა აზრები გაცვალეს COP17-ის ფარგლებში იუნესკოს ჩართულობის უზრუნველყოფის პერსპექტივებსა და ერთობლივ ინიციატივებზე.

შეხვედრაზე ხაზი გაესვა კონფერენციის ფარგლებში დაგეგმილ თემატურ ღონისძიებებში, კერძოდ, სამიტში - „ბუნება და კულტურა“ და თემატურ დღეში - „განათლების დღე“, იუნესკოს აქტიური მონაწილეობის მნიშვნელობას. თანამშრომლობის მნიშვნელოვან პლატფორმად ასევე გამოიყო კონფერენციის ფარგლებში დაგეგმილი ინიციატივა - „ერევნის დიალოგი მთისა და მტკნარი წყლების ბიომრავალფეროვნების შესახებ“.