2 წუთი კითხვის
ამერიკის შეერთებული შტატების საგარეო უწყებამ სახელმწიფო მდივნის, მარკო რუბიოს სომხეთში განხორციელებული ვიზიტის შედეგები შეაჯამა. „არმენპრესის“ ცნობით, სახელმწიფო დეპარტამენტის ვებგვერდზე შესაბამისი განცხადება გამოქვეყნდა.
„აშშ-ის სახელმწიფო მდივანმა და სომხეთის საგარეო საქმეთა მინისტრმა განიხილეს აზერბაიჯანთან სამშვიდობო პროცესი, პროექტი - „ტრამპის მარშრუტი საერთაშორისო მშვიდობისა და კეთილდღეობისთვის“, ასევე სომხეთში მომავალი არჩევნები. ლიდერებმა გამოაცხადეს TRIPP-ის შესახებ ორმხრივი ჩარჩო შეთანხმების გაფორმების თაობაზე, ხელი მოაწერეს სტრატეგიული პარტნიორობის ქარტიასა და ურთიერთგაგების მემორანდუმს კრიტიკულად მნიშვნელოვანი წიაღისეულის შესახებ“, - ნათქვამია განცხადებაში.
აშშ-ის სახელმწიფო დეპარტამენტი აღნიშნავს, რომ ეს დოკუმენტები აღრმავებს ორმხრივ ურთიერთობებს და წინ წევს იმ შეთანხმებებს, რომლებიც შეერთებულ შტატებსა და სომხეთს შორის 2025 წლის 8 აგვისტოს, აშშ-ის პრეზიდენტ დონალდ ტრამპის მიერ ორგანიზებულ სომხეთ-აზერბაიჯანის ისტორიულ სამშვიდობო სამიტზე იქნა მიღწეული.
აშშ-ის სახელმწიფო მდივანი მარკო რუბიო სომხეთს 26 მაისს ეწვია. ვიზიტის ფარგლებში, სომხეთის საგარეო საქმეთა მინისტრ არარატ მირზოიანთან ერთად, ხელი მოეწერა ორ ქვეყანას შორის ყოვლისმომცველი სტრატეგიული პარტნიორობის ქარტიას, ჩარჩო მემორანდუმს კრიტიკულად მნიშვნელოვანი წიაღისეულისა და იშვიათი მინერალების მოპოვებისა და გადამუშავების სფეროში მიწოდების უზრუნველყოფის შესახებ, ასევე მოხდა სტრატეგიული თანამშრომლობის ჩარჩო შეთანხმების პარაფირება პროექტის - „ტრამპის მარშრუტი საერთაშორისო მშვიდობისა და საერთაშორისო კეთილდღეობისთვის“ თაობაზე.