ევროპის საბჭოს გენერალური მდივანი ერევანში ჩავიდა

ევროპული პოლიტიკური საზოგადოების (EPC) მე-8 სამიტში მონაწილეობის მისაღებად სომხეთში ევროპის საბჭოს გენერალური მდივანი ალენ ბერსე ჩავიდა.

„არმენპრესის“ ცნობით, ამის შესახებ სომხეთის რესპუბლიკის მთავრობამ განაცხადა.

 „ზვართნოცის“ საერთაშორისო აეროპორტში მას სომხეთის საგარეო საქმეთა მინისტრის მოადგილე რობერტ აბისოღომონიანი დახვდა.

 ევროპული პოლიტიკური საზოგადოების მე-8 სამიტი 4 მაისს ერევანში გაიმართება თემაზე: „მომავლის მშენებლობა: ერთიანობა და სტაბილურობა ევროპაში“.

ევროპული პოლიტიკური საზოგადოების პირველი სამიტი ჩეხეთის დედაქალაქ პრაღაში 2022 წლის 6 ოქტომბერს ჩატარდა.

 მას შემდეგ სამიტები თანმიმდევრობით გაიმართა მოლდოვის დედაქალაქ კიშინიოვში, ესპანეთის ქალაქ გრანადაში, გაერთიანებული სამეფოს ოქსფორდშირის საგრაფოში, უნგრეთის დედაქალაქ ბუდაპეშტში, ალბანეთის დედაქალაქ ტირანაში და დანიის დედაქალაქ კოპენჰაგენში.

 ევროპული პოლიტიკური საზოგადოება აერთიანებს დაახლოებით 50 ევროპული ქვეყნის ლიდერს თანასწორობის საფუძველზე, ერთიანობის სულისკვეთებითა და საერთო მიზნით.

იგი წარმოადგენს პოლიტიკურ პლატფორმას პოლიტიკური დიალოგისა და თანამშრომლობის სტიმულირებისთვის საერთო ინტერესის საკითხების მოსაგვარებლად, აგრეთვე ევროპის კონტინენტის უსაფრთხოების, სტაბილურობისა და კეთილდღეობის გასამყარებლად. ევროპული პოლიტიკური საზოგადოების სამიტი ევროპელ ლიდერებს გამოცდილების გაზიარებისა და თანამშრომლობის გაფართოების შესაძლებლობას აძლევს. იგი არ ანაცვლებს არცერთ არსებულ ორგანიზაციას, სტრუქტურას ან პროცესს.